नेपालगन्ज । बाँके प्रहरीले नेपालगन्जको जमुनाहा नाकामा नियन्त्रणमा लिएको कन्टेनरमा अफिम ब्राण्डको पोष्टर दाना (अफिम सिड) भएको पुष्टि भएको छ । प्रहरीले नियन्त्रणमा लिएको कन्टेनरबाट २५० बोरा अफिम ब्राण्डको पोष्टर दाना (अफिम सिड) बरामद गरेको हो ।
नेपालगञ्जबाट जमुनहा नाका हुदै भारतको रुपैडिहातर्फ गइरहेको आरजे ०९ जीबी ४५४२ भारतीय नम्बर प्लेटको बन्दबडी मालबाहक कन्टेनर शुक्रबार बिहान प्रहरीले नियन्त्रणमा लिएको थियो । भन्सार नाका पार गरि भारत प्रवेश गर्नै लाग्दा प्रहरीले सो कन्टेनरलाई नियन्त्रणमा लिएको थियो । प्रहरीले कन्टेनर नियन्त्रणमा लिएपनि प्रहरीकै अगाडि कन्टेनरका चालक र सह चालक फरार भएका थिए । २५० बोरी अफिम ब्राण्डको पोष्टर दाना (अफिम सिड) नियन्त्रणमा लिएर अनुसन्धान सुरु गरेको बाँके प्रहरुी प्रवक्ता डीएसपी मधुसुदन न्यौपानेले बताए ।
विशेष सुचनाका आधारमा सीमा नाका जमुनाहमा खटेको सशस्त्र प्रहरीका प्रहरी निरीक्षक जीवनलाल बुढा र नेपाल प्रहरीका वरिष्ठ प्रहरी नायव निरीक्षक माधव रिजालको कमाण्डको संयुक्त टोलीले कन्टेनर नियन्त्रणमा लिएको थियो । प्रहरी स्रोतका अनुसार कन्टेनरमा अफिम र सुन निकासी हुँदैगरेको सूचना प्रहरीले पाएपनि कन्टेनरमा सुन भने नभेटिएको बताइएको छ ।
पोष्टर दाना अफिमको बिउ बजार मूल्य २५ केजीको प्रति बोराको करिब ५० हजार पर्ने बताइएको छ ।
प्रतिक्रिया