काठमाडौं । चर्चित युवा नेत्री रञ्जु दर्शनाले काठमाडौं निर्वाचन क्षेत्र नं. ५ बाट चुनाव लड्ने घोषणा गरेकी छन् ।
उनले सामाजिक सञ्जालबाट आफ्नो उम्मेदवारी घोषणा गरेकी हुन् । ‘तपाईहरूले विभिन्न माध्यमबाट आउने संघीय निर्वाचनमा मेरो उम्मेदवारी रहने कुरा थाहा पाइसक्नु भएको छ,’ उनले भनेकी छन्, ‘आज आधिकारिक रूपमा आउने निर्वाचनमा काठमाडौं क्षेत्र नं. ५ बाट प्रतिनिधि सभा सदस्य पदमा निर्वाचित हुनका लागि प्रतिस्पर्धामा उत्रने कुरा यँहाहरू समक्ष बाँड्न पाउँदा हर्षित छु ।’
२०७४ को निर्वाचनमा यस क्षेत्रबाट विवेकशील नेपाली दलका तर्फबाट उज्ज्वल थापाले प्रतिस्पर्धा गरेका थिए । उनको कोरोनाभाइरसको संक्रमणबाट निधन भएको थियो । विवेकशील दलका संस्थापक थापाले प्रतिस्पर्धा गरेकै क्षेत्र दर्शनाले रोजकी छन् ।
यो क्षेत्रबाट नेकपा (एमाले)का वरिष्ठ उपाध्यक्ष ईश्वर पोखरेल निर्वाचित भएका थिए । नेपाली कांग्रेसका नेता डा. प्रकाशशरण महतले पनि यहि क्षेत्रबाट प्रतिस्पर्धा गरेका थिए ।
उनले आफ्नो अभियानमा सहयोग गर्न पनि आह्वान गरेकी छन् । विवेकशील साझामा विवाद उत्पन्न भएपछि उनी अलग भएकी थिइन् । उनले स्वतन्त्र रुपमा उम्मेदवारी दिने भएकी हुन् ।
यो क्षेत्रमा तीन वटा स्थानीय तहका १५ वटा वडा पर्छन् । जसमा काठमाडौं महानगरपालिकाका वडा नं. २, ३, ४, ५, बुढानीलकण्ठ नगरपालिकाका वडा नं. ३, ४, ५, ६, ७ र टोखा नगरपालिकाका वडा नं. २, ३, ४, ५, ६ र ७ छन् ।
प्रतिक्रिया