अर्थमन्त्री शर्माले दिए पदबाट राजीनामा

काठमाडौं । अर्थमन्त्री जनार्दन शर्माले राजीनामाको घोषणा गरेका छन् ।

आफुमाथि अनावश्यक लान्छना लगाएको बताउँदै आफुमाथि गरिएको छानबिन समितिलाई सहयोग गर्ने प्रतिवद्धता जनाउँदै शर्माले राजीनामाको घोषणा गरेका हुन् ।

विगतमा पनि छानबिन समिति बनाएको तर कसैले राजीनामा नगरेको दृष्टान्त दिँदै उनले छानबिनका लागि मार्ग प्रशस्त गर्दै राजीनामा दिएको घोषणा गरेका हु्न ।

राजीनामा दिनुअघि प्रतिनिधिसभा बैठकलाई सम्बोधन गर्दै शर्माले आफूले अर्थ मन्त्रालयको सीसीसीटिभीको फुटेज डिलिट नगरेको दाबी गरे। उनले आफूले सीसीटिभीको फुटेज डिलिट नगरेको दाबी गरेका हुन् । यसको ज्ञान पनि नरहेको उनको भनाइ छ ।

‘मैले सीसीटिभीको फुटेज डिलिट गरेको छैन । यसको ज्ञान पनि छैन मसँग,’ उनले भने, ‘यो प्राविधिक कुरा हो, प्राविधिकले जान्ने विषय हो । गलत प्रचार गरियो ।’

आगामी आर्थिक वर्षको बजेट सार्वजनिक गर्नु अघिल्लो दिन २४ जेठ मध्यराति अनाधिकृत व्यक्तिलाई मन्त्रालयमा प्रवेश गराएर करको दर हेरफेर गरेको आरोप अर्थमन्त्री शर्मामाथि लागिरहेको छ । पछिल्लो १३ दिनको मात्र फुटेज रहने र बाँकी आफैं मेटिँदै जाने अर्थ मन्त्रालयले बताएपछि नियोजित रुपमा डिलिट गरिएको आरोप पनि अर्थमन्त्री शर्मामाथि लागेको छ ।

यस विषयमा छानबिन गर्न बुधबार सभामुख अग्निप्रसाद सापकोटाले ११ सदस्यीय संसदीय विशेष छानबिन गठन गरेका छन् ।