बुटवल । लुम्बिनी प्रदेश सरकारको शिक्षा मन्त्रालयले लुम्बिनी प्रदेश विश्वबिद्यालयको उपकुलपति छनौट प्रक्रिया अगाडि बढाएको छ । गत असार ३१ गते उपकुलपतिका लागि आवेदन आह्वान गरेको सिफारिस समितिले आवेदकहरुबाट विश्वबिद्यालयको बिकास प्रस्ताव बुझ्दै नियुक्तिको प्रक्रिया अगाडि बढाएको हो ।
बाँकेको खजुरामा प्रस्ताव गरिएको विश्वबिद्यालयको उपकुलपतिकालागि ४ जनाको निबेदन परेपनि एकजनाको योग्यता नपुगेपछि तीनजनाले प्रतिस्पर्धा गरिरहेको मन्त्रालयको उच्च शिक्षा महाशाखाले जनाएको छ । आवेदकहरु प्राडा लक्ष्मण ज्ञवाली, प्राडा बिनोद ढकाल र प्राडा मोहन पन्थीले आज सिफारिस समिति समक्ष विश्वबिद्यालय बिकास प्रस्ताव प्रस्तुत गरेका छन् ।
आवेदकबाट प्रस्तुत भएको प्रस्ताव योजनाका आधारमा सिफारिस समितिले प्रदेश सरकारको मन्त्रिपरिषदलाई नियुक्तिका लागि सिफारिस गर्ने मन्त्रालयका प्रवक्ता यमबहादुर केसीले जानकारी दिए ।
विश्वबिद्ययालय ऐन अनुसार मुख्यमन्त्री कुलपति रहने विश्वबिद्यालयमा शिक्षा मन्त्री संयोजक, शिक्षा सचिव र कुलपतिले तोकेको एकजना सदस्य रहने गरि सिफारिस समिति रहने व्यवस्था छ ।
प्रदेश सरकारले अघिल्लो आवमा नै विश्वबिद्यालय स्थापना र संचालनका लागि बजेट बिनियोजन गरेपनि कार्यबिधि र ऐन बन्न नसक्दा बजेट फ्रिज भएको थियो । विश्वबिद्यालयका लागि बाँकेको खजुरा गाँउपालिकाले ११० बिगाहा जग्गा छुट्याएर हक हस्तान्तरणका लागि सिफारिस गरिसकेको छ । बाँके जिल्ला समन्वय समिति बाँकेले समेत गाँउपालिकाले गरेको सिफारिसलाई सदर गर्दै विश्वबिद्यालयको नाममा हस्तान्तरण गर्न संघीय सरकारलाई सिफारिस गरिसकेको खजुरा गाँउपालिकाका अध्यक्ष डम्बर बिकले बताए ।
खजुरा गाँउपालिकाबाट फायल आएपनि त्यसको प्रक्रिया अगाडि नबढेको प्रदेश शिक्षा मन्त्रालय उच्च शिक्षा महाशाखा प्रमुख टिकाराम अर्यालले बताए । जग्गा प्राप्तीको प्रक्रिया बुझेर सो फायल अगाडि बढाईने उनले जनाए ।
प्रतिक्रिया