चितवन । एक दिनपछि सञ्चालनमा आएको नारायणगढ-मुग्लिन सडकखण्ड पुन: अवरुद्ध भएको छ ।
चितवनको भरतपुर महानगरपालिका-२९ मा पर्ने केराबारीमा गएराति २ बजे पुन: पहिरो खसेको जिल्ला प्रहरी कार्यालय चितवनका डीएसपी नरहरी अधिकारीले जानकारी दिए । पहिराले सडक पुन: अवरुद्ध भएको छ ।
यसअघि सोमबार राति ११ बजे पहिरो खसेपछि सडक अवरुद्ध भएको थियो । मंगलबार दिनभर लागेर पहिरो पन्छाएपछि राति १० बजेदेखि सञ्चालनमा आएको थियो ।
सञ्चालनमा आएको चार घण्टामै फेरी पहिरो खसेर सडक अवरुद्ध भएको डीएसपी अधिकारीले बताए । उनका अनुसार केराबारीमा पहाडको ढिस्को सहित पहिरो खसेको छ ।
सडक अवरुद्ध हुँदा सवारी साधन र यात्रु बाटोमै रोकिएका छन् । सडकमा गाडीका लामो लाइन लागेको छ ।
यो सडकमा बारम्बार पहिरो खस्दै आएको छ । वर्षायाम शुरु भएयता दर्जनौं पकट सडक अवरुद्ध भएको छ ।
प्रतिक्रिया