काठमाडौं । ७५औं स्वतन्त्रता दिवसको पूर्वसन्ध्यामा नेपालस्थित पाकिस्तानी राजदूतावासले नेपाल और उर्दू अदब नामक साहित्यिक कार्यक्रम आयोजना गरेको छ ।
नेपाल र पाकिस्तानबीचको साहित्यिक सम्बन्धलाई उजागर गर्नु र विशेषगरी दुई देशबीचको मैत्रीपूर्ण सम्बन्धलाई बलियो बनाउन कार्यक्रम आयोजना गरिएको पाकिस्तानी दूतावासले जनाएको छ ।
ठमेलस्थित होटल अलफ्टमा आयोजित कार्यक्रमको प्रमुख अतिथि शिक्षा विज्ञान तथा प्रविधिमन्त्री देवेन्द्र पौडेल थिए भने नेपाल प्रज्ञा प्रतिष्ठानका कुलपति गंगाप्रसाद उप्रेती विशेष अतिथिका रुपमा रहेका थिए । कार्यक्रममा राजनीतिज्ञ, सेवानिवृत्त तथा सेवानिवृत्त पदाधिकारी, बुद्धिजीवी, सामाजिक अभियन्ता, पत्रकार, साहित्यकार, विश्लेषकलगायत समाजका विभिन्न तहका व्यक्तिहरुको सहभागिता रहेको थियो ।
नेपाल, पाकिस्तान र युएईका प्रसिद्ध कविहरू डा जुबैर फारुक, डा. साकिब हारूनी, सैयद खालिद मोहसिन, सहर महमूद, इम्तियाज वाफा, जमशीद अन्सारी, फुरकान फैजी, असद कामरान, भोन निस्तज, शान्ति शर्मा, जफर अहमद अलिग र संगीता पामगारले कार्यक्रममा आआफ्नो साहित्यिक रचना वाचन गरेका थिए ।
कार्यक्रममा नेपाली लेखक तथा कवि डा अब्दुल मुबीन खानद्वारा लिखित पुस्तक “अहाङ–ए–हिमाला” पनि लोकार्पण गरिएको थियो।
कार्यक्रमका प्रमुख अतिथि शिक्षामन्त्री पौडेलले शिक्षा र स्वास्थ्य क्षेत्रमा पाकिस्तान सरकारको प्रयासको प्रशंसा गर्दै दुवै देशका नेपाली र उर्दू भाषी कविहरूलाई एकै ठाउँमा ल्याएर साहित्यिक कार्यक्रम आयोजना गरेकोमा पाकिस्तानी दूतावासको प्रशंसा गरे।
विशेष अतिथि गंगाप्रसाद उप्रेतीले साहित्यको प्रवद्र्धनमा पाकिस्तानी दूतावासले गरेको प्रयासको प्रशंसा गरे ।
नेपालका लागि पाकिस्तानका राजदूत सैयद हैदर शाहले सहभागी सबै कवि तथा लेखकहरूको प्रशंसनीय योगदानको प्रशंसा गरे । उनले विभिन्न क्षेत्र र देशका मानिसहरूलाई एकै ठाउँमा ल्याउन उर्दूको भूमिकालाई समेत प्रकाश पारे। उनले नेपाल र पाकिस्तानका साहित्यिक निकायहरूबीचको सहकार्यात्मक सम्बन्धलाई अझ प्रगाढ बनाउनुपर्नेमा जोड दिए ।
प्रतिक्रिया