काठमाडौं । नेकपा माओवादी केन्द्र र बाबुराम भट्टराईको नेपाल समाजवादी पार्टी नेसपाले आज निर्वाचन आयोगमा दल दर्ता गर्नेभएका छन् ।
आज बिहान बसेको माओवादी केन्द्रको स्थायी समिति बैठकले आज दल दर्ता गर्ने निर्णय गर्दै बाबुरामको नेकसपालाई गोलाकारभित्रको हँसिया हथौडा चुनाव चिन्हबाट चुनाव लड्न दिने निर्णय गरेको छ ।
तीन दिन अघि अध्यक्ष प्रचण्ड र भट्टराईबीच भएको छलफलमा दुई पार्टीले यौटै चुनाव चिन्ह, साझा घोषणापत्रका साथ निर्वाचनमा जाने सहमति गरेको थियो । पार्टी एकता गर्ने उद्देश्यसहित गरिएको सहमतिअनुसार आज दुवै पार्टी यौटै चुनावचिन्हका साथ दल दर्ता गर्न जान लागेका हुन् । दिउँसो १ बजे दल दर्ता गर्ने माओवादीले जनाएको छ ।
माओवादी बैठकमा प्रचण्डले भट्टराईसँग भएको सहमतिबारे नेताहरुलाई जानकारी गराएका थिए ।
बैठकले भट्टराई र गौतमलाई आफ्नो चुनाव चिन्हमा लड्न स्वीकृति दिएको प्रवक्ता कृष्णबहादुर महराले जानकारी दिए । ‘बाबुराम भट्टराई र वामदेव गौतमलाई हँसिया हतौडामा चुनाव लड्न पार्टीले स्वीकृति दिएको छ। उहाँहरूका केही शर्त छन् । ति विषयमा थप छलफल गरिने छ,’ महराले भने ।
निर्वाचन आयोगले ऐनअनुसार दुई वा दुई भन्दा बढी पार्टीले एउटै चुनाव चिह्न प्रयोग गर्न पाउने जनाएको थियो । तर, त्यसबारे आयोगलाई दल दर्ता गर्ने बेलामै जानकारी गराउनुपर्ने व्यवस्था रहेको छ ।
प्रतिक्रिया