बुटवलमा संचालनको तयारीमा रहेको भारतिय प्रजनन् स्वास्थ्य शिविरमाथि उपमहानगरको हस्तक्षेप, शिविर चलाउन रोक

बुटवल । गैरकानुनीरुपमा प्रजनन उपचार भन्दै भारतबाट नेपालमा आएर स्वास्थ्य परामर्श दिन खोज्ने एक चिकित्सकको शिबिरलाई बुटवल उपमहानगरले हस्तक्षेप गरेर रोकेको छ । गोरखपुरकी एक स्त्री रोग विशेषज्ञको नाममा प्रजजन् स्वास्थ्य शिविर राख्ने तयारीमा रहेकी डा. नेहा सिंहको शिविरलाई उपमहानगरको स्वास्थ्य महाशाखाले रोक लगाएको हो ।

बुटवल स्थित होटल डासिंसमा आजबाट शुरु हुन गईरहेको प्रजनन् स्वास्थ्य शिविरलाई रोक लगाईएको बुटवल उपमहानगर स्वास्थ्य शाखा प्रमुख युवराज पाण्डेले बताए । नेपाल सरकारको कुनै पनि निकायमा सूचीकृत नगरि र कुनै निकायबाट स्विकृती समेत नलिई शिविर संचालनको तयारी गरिएकाले रोक लगाईएको पाण्डेले बताए ।

पाण्डेका अनुसार लुम्बिनी प्रादेशिक अस्पतालमा कार्यरत स्त्रीरोग विशेषज्ञ डा. बिन्दु खरेलको सहयोगमा गोरखपुरकी विशेषज्ञ भनिएकी नेहा सिंहले बुटवलमा प्रजनन् स्वास्थ्य शिविर चलाउने तयारी गरेकी थिईन् । नेपालको मेडिकल काउन्सिल र कुनै निकायबाट अनुमति नपाएका कसैलाई स्वास्थ्य जस्तो संवेदनशिल विषयमा खेडवाल गर्ने छुट नदिईने प्रमुख पाण्डेले बताए ।

निशुल्क भिडियो एक्सरे, निशुल्क दर्ता र परामर्शको विज्ञापन गरेर प्रजनन् समस्या भएका महिलाहरुलाई भारतमा उपचार गर्न पठाउने मिशनका साथ शिविर संचालन गर्ने तयारी गरिएको उनले बताए ।