बुटवल । बुटवलस्थित बुटवल कृषि उपज थोक बजार केन्द्रमा बिक्रीका लागि ल्याइएको हरियो बोडीमा अत्यधिक विषादी प्रयोग गरिएको भेटिएपछि नष्ट गरिएको छ ।
विषादी अवशेष द्रुत विश्लेषण प्रयोगशाला एकाई बुटवलले आज बिहान बजारमा आएका तरकारी तथा फलफूलको नमुना संकलन गरी परीक्षण गर्दा चितवनबाट ल्याइएको बोडीमा उच्च मात्रामा विषादी अवशेष फेला परेको हो ।
प्रयोगशालाका अनुसार बुटवल उपमहानगरपालिकासँग समन्वय गर्दै विषादीयुक्त करिब १२० केजी बोडी डम्पिङ साइटमा लगेर नष्ट गरिएको छ । बजारमा दैनिक रूपमा आउने तरकारी तथा फलफूलको नमुना संकलन गरी परीक्षण गर्ने कार्य नियमित रूपमा हुँदै आएको छ ।
प्रयोगशालाका नायब प्राविधिक सहायक राजिब भण्डारीका अनुसार परीक्षणका क्रममा उक्त बोडीमा अर्गानोफस्फोरेट समूहको विषादी ९७.०६७ प्रतिशत ‘इनहिबिसन’ देखिएको थियो, जुन अत्यन्त जोखिमपूर्ण स्तर हो ।
प्राविधिकहरूका अनुसार शून्यदेखि ३५ प्रतिशतसम्मको विषादी अवशेष उपभोग योग्य मानिन्छ भने ३५ देखि ४५ प्रतिशतसम्म पुगेमा केही समय ‘क्वारेन्टाइन’मा राखेर पुनः परीक्षण गरिन्छ । तर ४५ प्रतिशतभन्दा माथि पुगेका तरकारी अनिवार्य रूपमा नष्ट गरिने प्रावधान रहेको छ ।
विशेष गरी ‘अफ सिजन’मा उत्पादन गरिएका तरकारीमा बढी विषादी प्रयोग हुने र किसानले ‘वेटिङ पिरियड’ पूरा नगरी बजारमा ल्याउँदा यस्तो समस्या देखिने गरेको प्राविधिकहरूको भनाइ छ ।
प्रतिक्रिया