बुटवल । वार्षिक कार्य सञ्चालन तालिका स्वीकृत गर्दै बुटवल उपमहानगरपालिकाको कार्यपालिकाको बैठक सम्पन्न भएको छ । नगरप्रमुख खेलराज पाण्डेयको अध्यक्षतामा बसेको बैठकले मंसिर भित्र उपभोक्ता समितिसँग सम्झौता गर्ने र माघ भित्रै ठेक्का प्रक्रियाबाट सञ्चालन हुने योजनाहरुको सम्झौतागर्ने तालिका स्वीकृत गरेको छ ।
स्वीकृत तालिका अनुसार साउनदेखि कात्तिकसम्म योजनाहरुको लगत स्टिमेट गर्ने, उपभोक्ता समिति गठन गर्ने र मंसिरमा सम्झौता गरेर जेठसम्म योजना सम्पन्न गर्नु पर्नेछ ।
क्रमागत योजनाहरु मंसिरसम्म सम्पन्न गर्ने र जेठ भित्र योजनाहरुको सुपरिवेक्षण, अनुगमन र फरफारक गरिसक्नुपर्ने गरी तालिका स्वीकृत गरिएको बुटवल उपमहानगरका प्रवक्ता शिव रानाले जानकारी दिए ।
रानाका अनुसार नगर क्षेत्र भित्रका अव्यवस्थित बसोबासीको जग्गा ब्लक छुट्याउने काम सम्पन्न भएका जग्गाको नाप नक्शांकन प्रक्रिया अघि बढाउने निर्णय बैठकले गरेको छ । बैठकले नगरको खर्चमा मितव्ययिता अपनाउनका लागि कर्मचारीहरुलाई उपलब्ध गराउँदै आएको इन्धन र मोबाइलखर्च कटौतीगर्ने निर्णय गरेको छ ।
बैठकले बुटवल १५ कर्साघाटमा निर्माण हुने आधुनिक प्रविधियुक्त कृषि उपज थोक बजार सम्बन्धी आयोजना प्राथमिकता प्राप्त आयोजनाकारुपमा अघि बढाउने निर्णय गरेको छ ।
यस्तै, बैठकले लुम्बिनी बस टर्मिनलको आय ठेक्काको न्यूनतम अंक तोक्ने, आर्थिक कार्य संचालन निर्देशिका २०७८ संशोधन गर्ने, वार्षिक खरिद योजना स्वीकृत गर्ने र कर्मचारी विधेयक २०७९ लोकसेवा आयोगसँग परामर्श गरी अघि बढाउने निर्णय गरेको प्रवक्ता रानाले जानकारी दिए ।
प्रतिक्रिया