नेपालगन्ज । बाँकेको कोहलपुरमा अतिक्रमण गरिएका संरचना हटाउन खोज्दा स्थानीबासीले अवरोध गरेका छन् । कोहलपुरको बासपार्कमा बनाईएका अस्थायी टहरा र केही पक्की संरचना हटाउन खोज्दा स्थानीयले ढुँगामुढा गर्दै अवरोध पु¥याएका हुन् ।
कोहलपुर नगरपालिकाका नगर प्रमुख पूर्णप्रसाद आचार्य सहितको नेतृत्वमा टोली बिहानै देखि अतिक्रमण हटाउन खटिएको थियो । कोहलपुरको न्यूरोडमा रहेको ३/४ वटा अतिक्रमित टहरा भत्काएर बसपार्क पुगेको डोजरमाथि स्थानीयले ढुङ्गा प्रहार गरेपछि विवाद उत्पन्न भएको प्रहरीले जनाएको छ ।
विकल्प नदिएर अचानक डोजर लगाएको भन्दै स्थानीय बासिन्दा विरोधमा उत्रिएको र स्थिती तनावपुर्ण बनेको इलाका प्रहरी कार्यालय कोहलपुरका प्रमुख डीएसपी ऐन बहादुर मल्लले बताए । स्थिती तनावपुर्ण हुने अवस्था आएपछि हाललाई डोजर फर्काईएको मल्लले बताए ।
कोहलपुरका नगर प्रवक्ता नमबहादुर आलेले केही समयका लागि स्थगित भएपनि अतिक्रमण हटाउने काम नरोकिने बताए । उनले असार मसान्त पहिले नै ३५ दिने सूचना जारी गरि हटाउन भनिएपनि वर्षादको समय भन्दै समय मागेकाले केही ढिला गरि हटाउन सुरु गरिएको भन्दै अव नरोकिने बताए । उनले अतिक्रमणकारीलाई लिएर राजनीति गर्न खोजिएको समेत बताए ।
प्रतिक्रिया