काठमाडौं । मंसिर ४ को निर्वाचनका लागि समानुपातिक प्रणालीअन्तर्गत मनोनयन दर्ता गर्ने दिन नजिकिँदै जाँदा सत्तारुढ गठबन्धनलाई सिट बाँटफाँटको सकस मिलाउन हम्मेहम्मे परिरहेकोछ ।
प्रधानमन्त्री निवास बालुवाटारमा निरन्तर बैठक बसेपछि दलहरुबीच सिटबाँटफाँटमा सहमति जुट्न सकेको छैन् ।
आगामी असोज ३ गते निर्वाचनआयोगलाई दलहरुले क्लस्टर मिलाएर समानुपातिक उम्मेदवारहरुको बन्द सूची बुझाउनुपर्ने कार्यतालिका रहेको छ । प्रत्यक्ष तर्फको सिटका लागि सहमति जुटेपछि मात्र दलहरुले कुन नेतालाई समानुपातिमा पठाउने भन्ने निर्णय गर्न सक्ने भएकाले पनि आज भोलिमै सिट बाँटफाँटको टुंगो लगाउनै पर्ने बाध्यता रहेको छ ।
दलहरुले आआफ्नो अडान छोडेका छैनन् । विशेषगरी नेकपा एकीकृत र जनता समाजवादी पार्टी जसपाले धेरै सिटमा दाबी गर्दा मिलाउन कठिन भएको छलफलमा सहभागी नेताहरुले बताउने गरेका छन् ।
बालुवाटारमा आज पनि गठबन्धनका शीर्ष नेताहरुबीच छलफल भैरहेको छ । बैठकमा सिट बाँटफाँट कार्यदलका सदस्यहरु पनि सहभागी छन् । जसपाले ३२ सिट रहेको मधेशमा धेरै सिट नपाए गठबन्धनबाटै बाहिरिने धम्की दिएपछि नेताहरुलाई दबाब परेको थियो । यद्यपी, जसपा अध्यक्ष उपेन्द्र यादव मिलेर जाने पक्षमै रहेपछि समझदारीको थप आशा पलाएको एक नेताले बताए ।
प्रतिक्रिया