काठमाडौं । राष्ट्रपतिले नागरिकता विधेयक प्रमाणीकरण नगरेको विषयमा सर्वोच्चमा परेको रिट हेर्न नभ्याइनेमा परेको छ ।
आजका लागि पेसी तोकिएपनि हेर्न नभ्याइने सूचीमा परेपछि रिटको सुनुवाइ अब आइतबार मात्र हुने भएको छ । न्यायाधीश मनोज शर्माको एकल इजलासमा पेसी तोकिएकोथियो । तर, शुक्रबार पालो नआएपछि सुनुवाइ आइतबारका लागि सरेको सर्वोच्च अदालतका प्रवक्ता विमल पौडेलले जानकारी दिएका छन् ।
अधिवक्ताहरू सागर बराल, सुनिल रञ्जन सिंह, सुनिल कुमार यादव, देव शर्मा र सोनु रौनियारले छुट्टाछुट्टै रिट दर्ता गर्दै नागरिकता विधेयक प्रमाणिकरण नगरेर राष्ट्रपति विद्यादेवी भण्डारी र राष्ट्रपतिको कार्यालयले संविधानको घोर उल्लंघन गरेको जिकिर गरेका थिए । उनीहरुले सो निर्णय उत्प्रेषणको आदेशबाट बदर गर्न र विधेयक प्रमाणीकरण गर्नका लागि परमादेशको माग गरेका थिए ।
यस्तै, सभामुख र उपसभामुख विरुद्धको रिट पनि हेर्न नभ्याइनेमै परेपछि आइतबार मात्रै सुनुवाइ हुनेभएको छ ।
प्रतिक्रिया