काठमाडौं । गत १८ गतेबाट परेको अविरल वर्षा र वर्षाका कारण आएको बाढी पहिरो अझै ३ दिन कायम रहने छ । मौसम विज्ञान विभागको बाढी सूचना केन्द्रले दिएको जानकारी अनुसार आगामी ३ दिन मुलुकका विभिन्न भागमा नदीको सतह बढ्ने, बाढी र पहिरो आउने पूर्वानुमान छ ।
आगामी तीन दिन गण्डकी प्रदेशको नारायणी, लुम्बिनी प्रदेशको तिनाउ, पूर्वी राप्ती, पश्चिम राप्ती, बबई, कर्णाली र महाकाली नदीहरूमा बहाव उल्लेख्य बढ्ने मौसम विज्ञान विभागको बाढी सूचना केन्द्रले जनाएको छ । ती नदीहरुले खतराको तह नाघ्न सक्ने पूर्वानुमान गरेको छ ।
बाढी सूचना केन्द्रले आज बिहान ७ बजे एक सूचना जारी गर्दै आज पश्चिम राप्ती, बबई, तिनाउ र तिनका सहायक नदीहरुमा पानीको बहाव खतरा तह आसपास पुगेको छ । वर्षा जारी रहेको र बाढी बढ्दो क्रममा रहेको पनि जनाइएको छ ।
सूचनामा लुम्बिनी प्रदेशका सबै जिल्ला, गण्डकी प्रदेशका नवलपरासी पूर्व, तनहुँ र स्याङ्जा तथा कर्णाली प्रदेशको जाजरकोटका नदीहरुमा बहाव उल्लेख्य बढ्ने पूर्वानुमान छ ।
यसैगरी झापा, मोरङ, सुनसरी, बारा, पर्सा, मकवानपुर, सिन्धुपाल्चोक, धादिङ, नुवाकोट, रसुवा गोरखा, लम्जुङ, कास्की, मनाङ, मुस्ताङका नदीहरुमा बहाव बढ्ने र केहीमा आकस्मिक बाढी आउने पूर्वानुमान छ । यसैगरी बागलुङ, म्याग्दी, रुकुम पूर्व, रुकुम पश्चिम, सल्यान, सुर्खेत, दैलेख, जुम्ला, कालिकोट, कैलाली, कन्चनपुर, डडेलधुरा, डोटी, अछाम, बाजुरा, बझाङ, बैतडी र दार्चुलाका नदीहरुमा पनि बहाव बढ्ने र केहीमा आकस्मिक बाढी आउने पूर्वानुमान रहेको बाढी सूचना केन्द्रले जनाएको छ ।
असोज २१ गते भने लुम्बिनी, कर्णाली र सुदूरपश्चिम प्रदेश भई बग्ने अधिकांश नदीहरुमा बहाव उल्लेख्य बढ्ने छ
प्रतिक्रिया