भैरहवा । रुपन्देहीका उद्योगी व्यवसायी आन्दोलित भएका छन् । उद्योग व्यवसाय धराशयी हुनेगरी बैंकहरूले दोहोरो अंकमा कर्जाको ब्याजदर वृद्धि गरेको तथा व्यवसायीलाई धरपक्कड गरिरहेको भन्दै सडक आन्दोलनमा उत्रिएका हुन् ।
गृहमन्त्री बालकृष्ण खाँण चुनाव प्रचार प्रसारका क्रममा हिँडेका बेला उद्योगी व्यवसायीले बैंकको ब्याजदर घटाइदिन भन्दै माग गरेका हुन् । रुपन्देहीमा क्रियाशील व्यावसायिक संघसंस्थाहरूको सञ्जाल रुपन्देहीले नेपाल राष्ट्र बैँक र जिल्ला प्रशासन कार्यालय रुपन्देहीमा ज्ञापनपत्र बुझाउँदै बैंक तथा वित्तीय संस्थाको ज्यादतीबिरुद्ध संयुक्त विरोध प्रदर्शन गरेका थिए ।
भैरहवाको बुद्ध चोक, नारायण स्थान, आवारोड, बैंक रोडमा प्रदर्शन गर्दै उद्योगी ब्यापारीहरूले राष्ट्र बैँकको नीति खारेज गर, ब्यावसायिक एकता जिन्दावाद, बैँकको ज्यादती बन्द गर, निजी क्षेत्र प्रभावित हुने निर्देशिका लाद्न पाइँदैन, एकल बिन्दुमा ब्याजदर कायम गर्नुपर्नेलगायतका नाराबाजी गरेका थिए ।
संयुक्त संघर्ष समितिका संयोजक तथा रुपन्देही उद्योग संघका अध्यक्ष माधवप्रसाद पौडेलको हस्ताक्षरित विज्ञप्तिमा पुँजी विस्तार गरी उद्योग ब्यवसायलाई बचाइराख्न कोसिसरत उद्योगी ब्यवसायीहरू हालै नेपाल राष्ट्र बैँकद्वारा लागू गरिएको चालू पुँजी कर्जा निर्देशिका २०७९ को प्रभावले आन्दोलित बनेको उल्लेख छ ।
नेपाल उद्योग वाणिज्य संघ लुम्बिनी प्रदेशका अध्यक्ष कृष्णप्रसाद शर्मा, बुटवल उद्योग वाणिज्य संघका अध्यक्ष उज्जवल कसजु, सिद्धार्थ उद्योग वाणिज्य संघका अध्यक्ष भिष्मप्रसाद न्यौपाने, रुपन्देही उद्योग संघका अध्यक्ष माधवप्रसाद पौडेल, रुपन्देही ब्यापार संघका अध्यक्ष कृष्णप्रसाद घिमिरे, तिलोत्तमा उद्योग वाणिज्य संघका अध्यक्ष गुणनिधि भण्डारी, पश्चिम नेपाल बस ब्यवसायी प्रालिका अध्यक्ष दधिराम खरेल, नेपाल घरेलु तथा साना उद्योग महासंघ रुपन्देहीका अध्यक्ष ध्रुव धिताललगायत ५० वटा उद्योग संस्थाले सरकारको गलत नीतिको विरोध गर्दै ज्ञापनपत्र बुझाएका थिए ।
प्रतिक्रिया