नेपालगन्ज । बाँकेको सिमावर्ती क्षेत्रमा सरकारी कर्मचारी नै लागु औषध ओसारपसारमा संलग्न भएको पाइएको छ । नेपालगन्जबाट दाङ जाँदै गरेको अवस्थामा डिभिजन वन कार्यालय, घोराही दाङका रेन्जर किरण तिवारी ठूलो मात्रामा लागु औषधी ब्राउनसुगरसहित पक्राउ परेसँगै लागु औषध ओसारपसारमा सरकारी कर्मचारी र सरकारी सवारी प्रयोग हुने गरेको पुष्टी भएको हो ।
तुलसीपुर उपमहानगरपालिका १८, हेमन्तपुरका २८ वर्षीय रेन्जर तिवारीले सरकारी नम्बर प्लेटको मोटरसाइकलमा १४ ग्राम ५ सय मिलिग्राम ब्राउनसुगर दाङ लैजाँदै गरेको अवस्थामा कोहलपुर प्रहरीले बाटैमा पक्राउ गरेको छ । तिवारीलाई पूर्वपश्चिम राजमार्गअन्तर्गत बाँकेको ढकेरीमा पक्राउ गरिएको कोहलपुर प्रहरीले जनाएको छ ।
रा १ ब ८९९ नम्बरको मोटरसाइकलमा सवार रेन्जर तिवारीले मोटरसाइकलको सक र हेडको बीचमा हरियो रंगको प्लाष्टिकमा पोका पारेर ब्राउनसुगर लैजादै गरेको अवस्थामा प्रहरीले पक्राउ गरेको इलाका प्रहरी कार्यालय कोहलपुरका प्रमुख डीएसपी ऐन मल्लेले जानकारी दिए । गोप्य सूचनाको आधारमा इलाका प्रहरी कार्यालय, कोहलपुरबाट प्रहरी निरीक्षक नवचन्द्र मल्लको कमाण्डमा खटिएको टोलीले तिवारीलाई पक्राउ गरेको डीएसपी मल्लले बताए । तिवारी पछाडी बसेको सो मोटरसाइकल घोराही उपमहानगरपालिका वडा नं. १५, रतनपुर निवासी २७ वर्षीय भरत चौधरीले चलाएका थिए ।
प्रहरीका अनुसार तिवारीले बर्दियाको सीमावर्ती भारतीय बजारबाट ५५ हजार रुपैयामा ब्राउनसुगर किनेर ल्याएका थिए ।
कोहलपुर प्रहरीले कात्तिक ४ गते कोहलपुर नगरपालिका २, विकासनगरका २४ वर्षीय विजय भन्ने वीरबहादुर विकलाई ७ सय १० मिलिग्राम र सोही दिन बैजनाथ गाउँपालिका ५, वनकटुवाबाट २६ वर्षीय मनिष थारुलाई ७ सय ८० मिलिग्राम ब्राउनसुगरसहित पक्राउ गरेको थियो
प्रतिक्रिया