काठमाडौं र भक्तपुरमा २ किशोरीमाथि बलात्कार

काठमाडौं । काठमाडौ र भक्तपुरमा १६ र १४ वर्ष उमेरका २ जना किशोरी बलात्कृत भएका छन् । बलात्कारको अभियोगमा दुबै स्थानबाट अभियुक्तलाई पक्राउ गरिएको प्रहरीले जनाएको छ ।

भक्तपुरमा भएको घटनामा बलात्कार गरेको अभियोगमा प्रहरीले भक्तपुर सूर्यबिनायक नगरपालिका–३ बालकोट बस्ने २२ वर्षीय रुपक खड्कालाई सोमबार राति प्रहरीले पक्राउ गरेको छ ।

खड्काले ती बालिकालाई पटक पटक बलात्कार गरेको भन्ने खबर प्राप्त हुनासाथ प्रहरी वृत्त ठिमीबाट खटिएको प्रहरीले उनलाई पक्राउ गरेको हो ।

यता काठमाडौंको कलंकीस्थित एक गेष्ट हाउसमा १६ वर्षीया किशोरीमाथि पनि बलात्कार भएको छ ।

किशोरीलाई बलात्कार गरेको अभियोगमा चन्द्रागिरी नगरपालिका–८ मातातिर्थ बस्ने २८ वर्षीय चन्दन महर्जनलाई सोमबार साँझ प्रहरीले पक्राउ गरेको छ ।

महर्जनले ती किशोरीलाई ललाई फकाई काठमाडौं महानगरपालिका–१४ कलंकीस्थित गेष्ट हाउसमा लगी विभिन्न मितिमा पटक पटक बलात्कार गरेको प्रहरीले जनाएको छ ।

प्रहरी वृत्त कालिमाटीबाट खटिएको प्रहरीले उनलाई मातातिर्थस्थित बौथली चोकबाट पक्राउ गरेको हो ।