बुटवल । दिदीको साइनो लगाएर सम्बन्ध बनाई अश्लील भिडियो बनाएर ब्ल्याकमेल गर्दै पटक-पटक करणी गर्ने एक जना बुटवलबाट पक्राउ परेका छन् । सुरुमा दिदीको नाता लगाएर सम्बन्ध बनाएपछि अश्लील भिडियो बनाएर ब्ल्याकमेलिङ गर्दै करणी गर्ने बुटवल उपमहानगरपालिका वडा नं १३ का ३६ वर्षीय सिद्धार्थ गुरुङलाई रुपन्देही प्रहरीले पक्राउ गरेको हो ।
एक महिलालाई जबर्जस्ती करणी गरेको कसुरमा गुरुङलाई पक्राउ गरिएको जिल्ला प्रहरी कार्यालय रुपन्देहीले जनाएको छ । एकल महिलालाई ब्ल्याकमेल गरी जबरजस्ती करणी गरेको अभियोगमा बुटवलबाट गुरुङलाई पक्राउ गरिएको रुपन्देही प्रहरी प्रवक्ता डीएसपी मनोहर भट्टले बताए । गुरुङले लगातार धम्की दिएर ती महिलालाई करणी गरेको भन्ने उजुरीका आधारमा पक्राउ गरिएको उनले बताए ।
गुरुङले सुरु सुरुमा ती महिलालाई दिदी भनेर नाता लगाएको र पछि अश्लील भिडियो बनाएर पटक-पटक बलात्कार गरेको भन्दै ती महिलाले प्रहरीमा उजुरी गरेकी थिइन् । ती महिला र गुरुङ केही समय व्यापारिक साझेदार समेत रहेको अनुसधानमा खुलेको प्रहरीले जनाएको छ ।
गुरुङलाई जबर्जस्ती करणी अभियोगमा जिल्ला अदालतबाट म्याद थप गराई अनुसनधान भइरहेको डीएसपी भट्टले बताए ।
प्रतिक्रिया