बुटवल । प्रतिनिधिसभा र प्रदेशसभा निर्वाचन केन्द्रीत लुमिबनी प्रदेश स्तरिय सुरक्षा बैठक सम्पन्न भएको छ । मुकाम राजधानी बुटवलमा सम्पन्न भएको बैठकले प्रदेशमा रहेका सुरक्षा चुनौतीको पहिचान गर्दै त्यस तर्फ केन्द्रीत भएर भयरहित वातावरणमा निर्वाचन सम्पन्न गर्न भूमिका खेल्ने निर्णय गरेको छ ।
बैठकले प्रदेशमा रहेको पहाडी र मधेसका सुरक्षा चुनौतीहरुको पहिचान गर्दै त्यस तर्फ विशेष सतर्कता अपनाउने निर्णय गरेको बैठकमा सहभागी एक सुरक्षा अधिकारीले बताए । तराईमा साना हातहतियार, जातीय तथा धार्मिक दङ्गा, खुल्ला सिमानाकामा हुन सक्ने अपराधिक गतिबिधि सुरक्षा चुनौती रहेको तथा पहाडी क्षेत्रमा भौगोलिक बिकतताका कारण मतपेटिकाको ओसारपसार, साधन र स्रोतको अपुगता, अपर्याप्त जनशक्ति साथै निर्वाचन बहिस्कारको घोषणा गरेका दल वा समुहबाट हुन सक्ने अवरोध मुख्य सुरक्षा चुनौती हुन सक्ने बैठकले आँकलन गरेको छ ।
बैठकमा १२ वटै जिल्लाका प्रमुख जिल्ला अधिकारीहरुले जिल्लाको सुरक्षा अवस्था र चुनोतीहरुका विषयमा प्रस्तुतिकरण गरेका थिए । सबै जिल्लाको रिपोर्टिङमाथि छलफल गर्दै बैठकले राज्यका सबै संयन्त्रहरुलाई सक्रियतापूर्वक परिचालन गर्ने र एक आपसमा बलियो समन्वय गरेर सुरक्षा व्यवस्था मिलाउने व्यवस्था मिलाइने प्रतिबद्धता जनाईएको ती अधिकारीले बताए ।
बैठकको प्रारम्भमा लुम्बिनी प्रदेश सरकार आन्तरिक मामिला, कानुन तथा सञ्चार मन्त्रालयका सचिव कोमलप्रसाद धमलाले प्रदेशको सुरक्षा अवस्था र चुनौतीहरुका विषयमा प्रस्तुतिकरण गरेका थिए । १२ जिल्लाका प्रमुख जिल्ला अधिकारीहरुको प्रस्तुतिकरणमा आधारित रहेर बैठकमा १ घण्टा छलफल गरिएको थियो ।
प्रदेश सरकारका आन्तरिक मामिला, कानुन तथा सञ्चार मन्त्री तिलकराम शर्माको अध्यक्षतामा बसेको बैठकलाई संघीय सरकारका गृहमन्त्री बालकृष्ण खाण, लुम्बिनी प्रदेशका मुख्यमन्त्री कुलप्रसाद केसी, गृहसचिव बिनोद प्रकाश सिंह, लुम्बिनी प्रदेश सरकारका मुख्य सचिव डा. दिपक काफ्ले, नेपाली सेनाका बालाध्यक्ष बिभागका रथी सरोज प्रताप राणा, नेपाल प्रहरीका महानिरक्षिक धिरजप्रताप सिंह, शसस्त्र प्रहरी महानिरिक्षक राजु अर्याल तथा राष्ट्रिय अनुसन्धान विभागका मुख्य अनुसन्धान निर्देशक हुतराज थापाले निर्देशनात्मक सम्बोधन गरेका थिए ।
प्रतिक्रिया