बुटवल । एमाले उपाध्यक्ष विष्णु पौडेलले निर्वाचनमा कुनै दलको एकल बहुमत नआउनु मुलुककोलागि दुर्भाग्य भएको बताएका छन् । निर्वाचनमा विजयी भएपछि पहिलोपटक पत्रकारहरुबीच आएका उपाध्यक्ष पौडेलले एमाले बाहेकका दलले भएपनि एकल बहुमत आएको भए राम्रो हुने बताए ।
उनले एमालेको राजनीतिक स्थायीत्वको एजेण्डा सफल नभएको उल्लेख गर्दै एमालेको नेतृत्व बिना देशले निकास नपानउने दाबी गरे । उपाध्यक्ष पौडेलले मुलुक गणितिय खेलमा जान सक्ने खतरा रहेको पनि औंल्याए । उनले एमालेले स्थिरता, विकास र समृद्धिको एजेण्डालाई पुरा गर्न प्राप्त परिणाममा टेकेर पहलकदमी लिने बताए ।
एमाले बाहेकका दललाई मतदान गर्ने मतदाताहरुलाई गुरु मानेर आफुले काम गर्ने प्रतिबद्धता व्यक्त गर्दै उनले प्रतिस्पर्धामा आएका दलहरुलाई पराजयको अर्थमा नबुझिदिन आग्रह गरे ।
एमालेका मुख्य पदाधिकारीलाई संसद बाहिर राखेर एमालेलाई कजोर बनाउने प्रयास गरिएको उल्लेख गर्दै उपाध्यक्ष पौडेलले एमाले अध्यक्ष केपी ओलीकै नेतृत्वमा एमालले नयाँ पहलकदमी लिने जनाए । ‘एमालेको तर्फबाट प्रधानमन्त्रीको क्याण्डिडेट केपी ओली नै हुनुहुन्छ ।’ उनले भने ।
प्रतिक्रिया