काठमाडौं । रवि लामिछानेले नेपाली नागरिकताको प्रमाणपत्र पुनः प्राप्त गरेका छन् ।
आइतबार बिहान जिल्ला प्रशासन कार्यालय काठमाडौंमा उनले पुनः नागरिकताको प्रमाणपत्र लिन निवेदन दिएका थिए ।
प्रक्रिया पुरा गरेर लामिछानेलाई नागरिकताको प्रमाणपत्र दिइसकेको काठमाडौंका सहायक प्रमुख जिल्ला अधिकारी देवी पाण्डे खत्रीले जानकारी दिइन ।
सर्वोच्च अदालतको संवैधानिक इजलासले लामिछानेले प्रयोग गर्दै आएको नागरिकताको प्रमाणपत्र अवैध ठहर गर्दै पुनः प्राप्ति गर्नुपर्ने फैसला गरेको थियो । सोही फैसलाअनुसार लामिछानेले अमेरिकी नागरिकता र पासपोर्ट त्यागेको निस्सा प्रशासनमा बुझाएका थिए । खत्रीकाअनुसार लामिछानेको २०५० सालमा लिएको नागरिकता नम्बर नै प्राप्त गरेका छन् ।
अमेरिकाको नागरिकता त्यागेपछि पुनः नेपाली नागरिकताको प्रमाणपत्र नलिइएको भन्दै गत शुक्रबार सर्वोच्च अदालतको संवैधानिक इजलासको आदेशअनुसार लामिछानेको सांसदसहित उपप्रधान तथा गृहमन्त्रीको पदमा गुमेको थियो । साथै राष्ट्रिय स्वतन्त्र पार्टीको सभापति पद पनि उनले गुमाएका थिए ।
प्रतिक्रिया