पेरिसडाँडामा माओवादी केन्द्रको पदाधिकारी बैठक

काठमाडौं । स्थायी समिति बैठकको नियमित कायूसूचीलाई स्थगित गरेर नेकपा माओवादी केन्द्रको पदाधिकारी बैठक बसिरहेको छ ।

पार्टी केन्द्रीय कार्यालय पेरिसडाँडामा पदाधिकारी बैठक बसिरहेको हो। बैठकमा हाल रिक्त रहेको गृहमन्त्रालयमा राष्ट्रिय स्वतन्त्र पार्टीका सभापति रवि लामिछानेको पुनः दाबीका विषयमा छलफल भैरहेको छ । लामिछानेको नागरिकता अवैध भएपछि सर्वोच्चको आदेशअनुसार मन्त्रीपदबाट बाहिरिएका लामिछानेले नागरिकता पुनः प्राप्ति गरेपछि सोही पदको दाबी गरेका छन् ।

यस्तै बैठकमा हिजो प्रधानमन्त्री एवं पार्टी अध्यक्ष पुष्पकमल दाहाल प्रचण्ड र एमाले अध्यक्ष ओलीबीचको छलफल, राष्ट्रपति निर्वाचन लगायतका समसामयिक विषयमा पनि छलफल भैरहेको छ ।

पार्टीको संगठनिक योजना र कार्यविभाजन सम्बन्धी तयार पारिएको योजनामा समेत छलफल हुँदैछ । पदाधिकारी बैठकबाट पारित भएको योजना स्थायी समिति र त्यसपछि केन्द्रीय समितिमा लैजाने तयारी छ ।