काठमाडौं । नेकपा एकीकृत समाजवादीले महंगी नियन्त्रण गर्न माग गर्दैै प्रधानमन्त्री पुष्पकमल दाहाल प्रचण्डलाई ज्ञापनपत्र बुझाएको छ ।
प्रधानमन्त्री निवास बालुवाटार पुगेर पूर्वप्रधानमन्त्री एवं एकीकृत समाजवादीका अध्यक्ष एवं पूर्वप्रधानमन्त्री माधवकुमार नेपालले प्रधानमन्त्री प्रचण्डलाई ज्ञापनपत्र बुझाएका हुन् । उनको ज्ञापनपत्रमा महंगी बढेर जनतालाई बाँच्न धौ धौ भैरहेको उल्लेख गरिएको छ ।
देशको अर्थतन्त्र गम्भीर संकटतर्फ उन्मुख भइरहेको भन्दै ज्ञापनपत्रमा मजदुर, किसान र सर्वसाधारण जनताले महँगीकै कारण दैनिकजसो आत्महत्या गर्न थालेको जनाइएको छ ।
महंगी बढ्दै जाँदा जनतामा चरम निराशा फैलिएको र राजनीतिप्रति नै वितृष्णा देखिएको एकीकृत समाजवादीको ठहर छ । ज्ञापनपत्रमा लेखिएको छ, ‘देशको आर्थिक संकट समाधानका लागि आवश्यक व्यवस्था गरोस् ।’
एकीकृत समाजवादीले देशको अर्थतन्त्रमा सुधार ल्याउन तत्काल अल्पकालीन र दीर्घकालीन उपाय अपनाउन आग्रह समेत गरेको छ । बैंक तथा वित्तीय संस्थाहरूको बचत तथा ऋण नीतिमा तत्काल सुधार गर्न पनि एकीकृत समाजवादीले माग गरेको छ ।
एकीकृत समाजवादी प्रचण्ड सरकारलाई विश्वासको मत दिएपनि प्रतिपक्षमा बसिरहेको छ । ज्ञापनपज्ञ बुझाउन अध्यक्ष नेपाल, सम्मानित नेता झलनाथ खनालसहितका नेताहरु पुगेका थिए ।
प्रतिक्रिया