काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले बालुवाटार पुगेर प्रधानमन्त्री पुष्पकमल दाहाल प्रचण्डलाई भेटेका छन् ।
गत शुक्रबार नागरिकता प्रकरणका कारण सर्वोच्चको फैसलाबाट सांसदपदसहित उपप्रधान एवं गृहमन्त्री गुमाएका लामिछाने पुनः सोही पदमा फिर्ता हुन प्रधानमन्त्रीसँग बारम्बार भेट गरिरहेका हुन् ।
आइतबार नागरिकताको नयाँ प्रमाणपत्र लिएसँगै एकैदिन पार्टीसदस्यता हासिल गर्दै पुनः सभापतिमा चयन भएका लामिछानेले उपप्रधानसहित गृहमन्त्रालयमै फर्किनका लागि लविङ बढाएका हुन् ।
गैरसांसदको रुपमा गृहमन्त्रालय छिर्न खोजेका उनीमाथि लागेको राहदानी दुरुपयोगको आरोपको विषय भने बाँकी नै छ । अहिले पुनः मन्त्रालयमा फर्केर ६ महिनाभित्र हुने उपनिर्वाचनमा विजयी बनेर सांसद पद सुरक्षित गर्ने लामिछानेको लक्ष्य रहेको छ ।
हाल खाली रहेको गृहमन्त्रालयको जिम्मा प्रधानमन्त्री स्वयंले सम्हालिरहेका छन् । नेकपा माओवादीकेन्द्रका नेताहरुले अब गृहमन्त्रालय आफैले राख्नुपर्ने तर्क गरिरहेका छन् । तर, रास्वपाले भने गृहमन्त्रालय आफ्नो भागमा रहेको भन्दै तत्काल मन्त्री नियुक्त गर्नुपर्ने माग गरेको छ ।
प्रतिक्रिया