अमेरिकाले नेपाललाई गरेको सहयोगमा कुनै भूराजनीतिक स्वार्थ छैन : समान्था पावर

काठमाडौं । अमेरिकी सहयोग नियोग (यूएसएआइडी)की प्रमुख समान्था पावरले नेपालमा अमेरिकाले गर्ने सहयोगमा कुनै भूराजनीतिक स्वार्थ नरहेको बताएकी छिन् ।

नेपाल भ्रमणको अन्तिम दिन बुधबार पत्रकार सम्मेलन आयोजना गरेर पावरले नेपाललाई दिँदै आएको सहयोगमा भूराजनीतिक स्वार्थबाट प्रेरित नरहेको बताएकी हुन् । उनले नेपाललाई प्राथमिकताका साथ सहयोग गरिरहेको बताइन । उनले भनिन, ‘अमेरिकाले नेपालमा गर्ने लगानीको कुनै भूराजनीतिक स्वार्थको उत्पादन होइन । नेपालसँग गरेको प्रतिबद्धताको उत्पादन हो । यो देशका जनताको कल्याणका लागि दसकौंदेखि गर्दै आएको कामले पनि प्रमाणित गरेको छ ।’

पावरले अमेरिकाले आयोजना गर्ने ’प्रजातन्त्र सम्मेलन’मा नेपालका प्रधानमन्त्रीलाई बोलाइएको जानकारी समेत दिइन । नेपालका प्रधानमन्त्रीले यसअघिको सम्मेलनमा व्यक्त गरेका प्रतिवद्धताहरुलाई व्यक्त गर्न पाउने अवसरका रुपमा अमेरिकाले हेरेको उनले बताइन ।