बुटवल । बुटवलमा जारी चौथो राष्ट्रपति रनिङ शिल्ड प्रतियोगिता २०७९ मा नाराबाजी भएको छ । आयोजकले खेल परिणाममा पक्षपात गरेको भन्दै सहभागी विद्यालयका विद्यार्थीहरुले नाराबाजी गरेका हुन् ।
आज संचालन गरिएको १०० मिटर दौडमा तेस्रो स्थानमा आएका त्रिभुवन युनाइटेड एकेडेमीका विद्यार्थी दिपक थापालाई पक्षपातपूर्ण तरिकाले फल्ड भएको भन्दै जबर्जस्ती कालिका माविका विद्यार्थीलाई विजयी घोषणा गरेपछि विद्यार्थीहरुले नाराबाजी गरेका थिए ।
दौड प्रतियोगितामा कुनै फल्डबिना तेस्रो स्थान हासिल गरेका विद्यार्थीलाई एम्पायरले विजयी घोषणा गरेरपनि पछि पुनः फल्ड भएको भन्दै कालिकालाई तेस्रो स्थान घोषणा गरेपछि सहभागी विद्यालयका विद्यार्थीहरु आक्रोशित भएका थिए ।
रेकर्ड गरिएको भिडीयोमा पनि कुनै फल्ड नभेटिएपनि कालिकाको प्रभावमा परेर धाँधली गरिएको त्रिभुवन युनाइटेड एकेडेमीका प्रधानाध्यापक रामचन्द्र बस्यालले बताए । उनले रनिङ शिल्डमा लगातार कालिकाको पक्षमा धाँधली हुँदै आएको भन्दै कालिका बाहेकका विद्यार्थीहरुलाई हतोत्साहित बनाउने काम भएको बताए ।
आजै सम्पन्न कवड्डी खेलमा १८ वर्ष उमेर समुह भन्दा माथिका विद्यार्थीहरु जर्सीमा भित्रिएपछि त्यहाँपनि केहिबेर तनाव भएको थियो । सहभागी विद्यालयले उमेर समुहको कुरा उठाएपछि कालिका सहित केहि विद्यालयका विद्यार्थीहरु आफै साइड लागेका थिए ।
प्रतियोगितामा धाँधली भएको सम्बन्धमा कालिकाका खेल शिक्षक समेत रहेका रनिङ शिल्ड प्रतियोगिताका उपसंयोजक हरिस वलीले नाराबाजीको विषयमा आफुलाई थाहा नभएको बताए । उनले निर्णायकहरुले गरेको निर्णय नै मान्य हुने भन्दै निर्णायकले गरेको निर्णयलाई सबैले मान्नु पर्ने बताए ।
प्रतियोगिताको पहिलो उदघाटन सत्रमा नै कालिकाको दबदबा कायम राख्दै अन्य सामुदायिक विद्यालयलाई हतोत्साहित बनाउने काम भएको नाम नबताउने सर्तमा एक विद्यालयका शिक्षकले बताए ।
प्रतिक्रिया