काठमाडौं । प्रधानमन्त्री पुष्पकमल दाहाल प्रचण्ड र नेकपा एकीकृत समाजवादी पार्टीका अध्यक्ष माधवकुमार नेपालबीच भेटवार्ता भएको छ ।
सिंहदरबारमा भएको भेटवार्तामा एकीकृत समाजवादीका अन्य नेताहरु पनि सहभागी छन् । राष्ट्रपति निर्वाचनका लागि मनोनयन गर्न दुई दिन मात्र बाँकी छँदा प्रचण्ड र नेपालबीच भेटवार्ता भएको हो ।
एमाले अध्यक्ष केपी शर्मा ओलीले आफ्नो दलको उम्मेदवारलाई माओवादीले समर्थन नगर्ने निश्चित भएपछि माधव नेपाललाई राष्ट्रपतिको उम्मेदवार बन्न प्रस्ताव गरेका छन् । त्यसपछि सक्रिय भएका नेपालले कांग्रेस सभापति शेरबहादुर देउवासँग पनि भेटवार्ता गरिसकेका छन् ।
तर, माओवादीले कांग्रेस उम्मेदवारलाई सघाउने निश्चित जस्तै भएपछि नेपालले पावर सेयरिङमा आफ्नो भूमिकाबारे प्रश्न उठाउन थालेका छन् ।
यससँगै माओवादी, कांग्रेस, एकीकृत समाजवादीबीच पुरानै गठबन्धन ब्यूँताउने र त्यसमा जनता समाजवादी पार्टी र राष्ट्रिय जनमोर्चालाई पनि पुनः सहभागी गराउने विषयमा छलफल हुन थालेको छ ।
प्रतिक्रिया