बुटवल । बैवाहीक बलात्कारको आरोपमा पक्राउ भइ कपिलवस्तुमा थुनामा रहेका न्यायाधीश भुवन गिरीकी पत्नी आरती रावल बाँकेको नेपालगन्जबाट पक्राउ परेकी छन् । न्यायाधीश गिरीमाथि बैवाहीक बलात्कारको मुद्दा दर्ता गराएकी गिरी पत्नी आरतीलाई जिल्ला प्रहरी कार्यालय बाँकेको टोलीले आइतबार पक्राउ गरेको हो ।
सरकारी काजग किर्ते गरेको अर्को एक मुद्दामा आरतीलाई पक्राउ गरिएको बाँके प्रहरीले जनाएको छ । बाँके जिल्ला अदालतबाट सरकारी कागज किर्तेमा पक्राउ पुर्जी जारी भएपनि उनी लामो समयसम्म फरार थिइन् । उनका श्रीमान न्यायाधीश गिरी पक्राउ परेको एक साता नबित्दै उनी पक्राउ परेकी हुन् । उनलाई सोमबार अदालतबाट ७ दिनको म्याद लिएर प्रहरीले अनुसन्धान सुरु गरेको बाँके प्रहरी प्रवक्ता डीएसपी रामप्रसाद घर्तीले जानकारी दिए ।
शैक्षिक प्रमाणपत्र लगायतका सरकारी कागजात किर्ते गरेको अभियोगमा रावललाई यसअघि नै पक्राउ गर्न बाँके जिल्ला अदालतले अनुमति दिएको थियो । आरतीमाथि न्यायाधीश गिरीका आफन्तले गाली बेइज्जतीको कम्तीमा ५ वटा मुद्दा बाँके जिल्ला अदालतमा दर्ता गराएका छन् भने न्यायाधीश गिरीले दर्ता गराएको आरतीसँग सम्बन्ध बिच्छेदको मुद्दा पनि जिल्ला अदालतमा बिचाराधिन छ ।
वैवाहिक बलात्कार मुद्दामा न्यायाधीश गिरी पनि यसअघि नै पक्राउ परिसकेका छन् ।
प्रतिक्रिया