नेपालगन्ज । नेपालगन्जको न्यूरोडबाट करिब पाँच किलो अवैध सुनका गरगहनासहित दुई जनालाई बाँके प्रहरीले पक्राउ गरेको छ । बाँके प्रहरीले नेपालगन्जको न्यूरोडस्थित एक होटलमा बसिरहेको २ जनालाई ४ दशमलव ९२७ किलोग्राम सुनका विभिन्न गहनासहित पक्राउ गरेको हो ।
सुनका गहनासहित पक्राउ पर्नेमा विराटनगरका महानगरपालिका वडा नं. ९ का ४२ बर्षीय रमेश सोनी र सोही ठाउँका ३६ बर्षीय प्रकाश ठाकुर रहेको बाँके प्रहरी प्रमुख एसपी सन्तोष सिंह राठौरले जानकारी दिए ।
पक्राउ परेका व्यक्तिका साथबाट सुनका सिक्री, चुरा, झुम्का, हार, ब्रास्लेट, मंगलसूत्र, बाला, ढुङ्ग्री, औँठी लगायतका सुनका गहना बरामद गरेको एसपी राठोरले बताए ।
साथै उनिहरुको साथमा इस्टमेट बिलको ठेली थान १, डिजिटल तराजु थान १, विभिन्न मितिमा विभिन्न स्थानमा विक्रि गरेको इस्टमेट विलहरु थान १४, एनआइसी एसिया बैंकमा ७ लाख ३३ हजार ४ सय जम्मा गरेको भौचर थान १, प्रकाश ठाकुरको नाममा ३ लाख ८६ हजार ४ सय काटेको एनएमबी बैंकको चेक थान १ र विभिन्न दरको नोट गरि नगद ३५ हजार प्रहरीले बरामद गरेको छ ।
प्रहरीका अनुसार विशेष सूचनाका आधारमा गरगहना झोलामा राखेर हिँडिरहेको अवस्थामा बुधवार राती गहनासहित सोनी र ठाकुरलाई प्रहरीले पक्राउ गरेको हो । उनिहरुको साथबाट सुन कहाँबाट आएको र कहाँ लैजादै गरेको भन्नेबारे अनुुसन्धान भईरहेको प्रहरीले जनाएको छ । बरामद गरिएको सुनको जम्मा मुल्य ४ करोड ६९ लाख ५ हजार ७ सय ६३ रहेको प्रहरीले बताएको छ ।
प्रतिक्रिया