बुटवल । बुटवलमा राष्ट्रिय लोक भजन चुड्का संरक्षण प्रतिष्ठान नेपालको तेस्रो अधिवेशन हुने भएको छ ।
यही वैशाख १६ र १७ गते हुने अधिवेशनको सम्पूर्ण तयारी अन्तिम चरणमा पुगेको प्रतिष्ठानका वरिष्ठ उपाध्यक्ष नारायण खनाल ‘लेकाली’ले जानकारी दिए ।
बुटवलको अन्तर्राष्ट्रिय सभागृहमा उद्घाटन सत्र तथा नयाँगाउँको मुक्तिनाथ धाममा बन्दसत्र हुने अधिवेशनमा देशभरबाट करिब ५ सय प्रतिनिधि सहभागी हुने आयोजकले जनाएको छ ।
अधिवेशनमा विभिन्न ठाउँका मौतिक भजन तथा चुड्का लगायतका प्रस्तुती समेत रहने लेकालीले बताए । महाधिवेशनको पहिलो दिन बुटवलको सिद्देश्वरी प्राङ्गणबाट विभिन्न सांस्कृतिक झाँकीहरुसहित कार्यक्रम स्थल अन्तर्राष्ट्रिय सम्मेलन केन्द्रसम्म र्यालीको आयोजना गरिएको छ ।
मौतिक संस्कृति तथा भजन, चुड्काको संरक्षण तथा पुस्तान्तरणका लागि २०६७ सालमा स्थापना भएको प्रतिष्ठानले देशका सबै जिल्लाहरुमा शाखा विस्तारलाई समेत तिब्रता दिएको संस्थापक अध्यक्ष प्रजापति पराजुलीले बताए ।
२०५० सालमा राष्ट्रिय लोक तथा दोहोरी गीत प्रतिष्ठानको निर्माण गरेका पराजुलीले फरक तथा धार्मिक र सास्कृतिक गीत संगीतको संरक्षणका लागि भजन चुड्का प्रतिष्ठानको स्थापना गरेका हुन् । यस प्रतिष्ठानमा हाल ५१६ जना आजीवन सदस्य रहेको पराजुली बताउँछन् ।
प्रतिक्रिया