नक्कली भुटानी शरणार्थी प्रकरणको बयान प्रेमप्रसाद न्यौपानेको इजलासमा

काठमाडौं । नक्कली भुटानी शरणार्थी प्रकरणका आरोपितहरूको बयान आजबाट सुरु हुँदैछ । । सो प्रकरणमा पक्राउ परेका १६ जनाको बयान न्यायाधीश प्रेमप्रसाद न्यौपानेको इजलासमा हुने भएको छ । काठमाडौं जिल्ला अदालतमा आजबाट उनीहरूको बयान लिइनेछ ।

शरणार्थी प्रकरणमा जिल्ला सरकारी वकिलको कार्यालयले ३० जनाविरुद्ध पाँच अभियोगमा अदालतमा मुद्दा दर्ता गरेकोमा १६ जनालाई पक्राउ गरेको छ भने १४ जना फरार छन् ।

अदातलतको कार्यतालिका अनुसार पक्राउ परेका प्रतिवादीहरूको न्यायाधीश न्यौपानेसामु बयान हुनेछ । बयान सकिएपछि थुनछेक बहस सुरु हुनेछ । थुनछेक बहसपछि अभियुक्तहरूलाई थुनामा राख्ने, धरौटीमा रिहा गर्ने वा सामान्य तारेखमा रिहा गर्ने भन्ने आदेश हुनेछ ।

नेपाली नागरिकलाई भुटानी शरणार्थी बनाएर अमेरिका पठाउने भन्दै रकम असुल गरी ठगीलगायत कसुर गरेको अभियोगमा ३० जनाविरुद्ध मुद्दा दायर गरिएको हो । उनीहरूविरुद्ध ठगीसहित सरकारी लिखत किर्ते, राज्यविरुद्धको अपराध, एकीकृत कसुर र संगठित अपराधमा मुद्दा दर्ता गरिएको छ ।