ब्युँतियो सांसद विकास कोष, सांसदलाई ५ करोड खर्च गर्ने अधिकार

काठमाडौँ । सरकारले नागरिकमाझ आलोचना भएको संसद विकास कोषलाई ब्युंताएको छ । आगामी आर्थिक वर्षमा सांसद विकास कोषमा प्रतिसांसद ५ करोड रुपैयाँ दिने निर्णय गर्दै सरकारले कोषलाई ब्युँताएको हो । आज बजेट भाषण गर्दै अर्थमन्त्री डा.प्रकाशशरण महतले प्रतिसांसद ५ करोडका दरले बजेट विनियोजन गरेको जनाएका छन् ।

सांसदहरुको बजेट वितरणमा जनताको असन्तुष्टी र नागरिकस्तरबाट कोष प्रति नकारात्मक टिप्पणी हुन थालेपछि तत्कालीन अर्थमन्त्री विष्णु पौडेलले आर्थिक वर्ष २०७८/७९ को बजेटबाट सांसद विकास कोषको नाममा दिने गरेको बजेट हटाएका थिए । कोषको रकम विकासको नाममा कार्यकर्तामा बाँडेर दुरुपयोग हुने गरेको भन्दै आलोचना हुँदै आएको थियो ।

नयाँ बजेटमा ‘संसदीय पूर्वाधार विकास कार्यक्रम’ अन्तर्गत प्रतिनिर्वाचन क्षेत्र ५ करोड रुपैयाँ छुट्याइएको मन्त्री महतले जानकारी दिए ।यसका लागि सरकारले ८ अर्ब २५ करोड रुपैयाँ बजेट विनियोजन गरेको छ ।

सुशील कोइराला प्रधानमन्त्री भएको बेला ‘पूर्वाधार विकास कोष’को नाममा सुरु भएको बजेटलाई पछि त्यसको नाम फेरेर ‘सांसद विकास कोष’ र ‘स्थानीय पूर्वाधार विकास साझेदारी कार्यक्रम’ राखिएको थियो । तर यो रकम विकासको नाममा कार्यकर्तामा बाँडेर दुरुपयोग हुने गरेको भन्दै आलोचना हुँदै आएको थियो ।