बुटवल । भारतले सांस्कृतिक पहिचान भन्दै हालसालै ग्रेटर भारतको नक्सा संसदभवनमा राखेपनि नेपालमा भने बुटवल उपमहानगरले २ वर्ष अगाडी नै ग्रेटर नेपालको नक्सा जितगढी किल्लामा राखेर बहादुर नेपालको इतिहास उजागर गरिसकेको छ । भारतीय संसदमा ग्रेटर भारतको नक्सा राखेपछि भारतसँग सिमा जोडिएका नेपाल, पाकिस्तान र बंगलादेशमा त्यसको विरोध भईरहेको छ ।
भारतले पटक पटक इतिहासको स्मरण गर्न सांस्कृतिकरुपमा मात्र नक्सा राखिएको बताउँदै आएपनि छिमेकी तिनैवटा देशमा भारतीय कदमको विरोध भइरहेको छ । भारतीय संसदमा राखिएको नक्सामा नेपालको नक्साभित्र पर्ने कपिलवस्तु, लुम्बिनी जस्ता ऐतिहासिक सम्पदाहरु समेटिएको प्रति नेपालको असहमति रहँदै आएको छ भने त्यही प्रकृतिका नक्साका कारण बंगलादेश र पाकिस्तानमा पनि बिरोधका स्वरहरु आइरहेका छन् ।
बुटवल उपमहानगरपालिकाले भने आफ्नो गुरुयोजना अन्तर्गत नै पारेर कम्पनी फौजलाई पराजित गरेको जितगढी किल्लामा २ वर्ष पहिले नै ग्रेटर नेपालको नक्सा राखेको थियो । भारतीय कदम लगत्तै काठमाडौं महानगरका नगर प्रमुख बालेन्द्र शाहले पनि आफ्नो कार्यकक्षमा ग्रेटर नेपालको नक्सा राखिसकेका छन् ।
नेपालको गौरवमयी इतिहास झल्काउन र सर्वसाधारणलाई नेपालको प्राचिन भु-भाग चिनाउन जितगढीमा ग्रेटर नेपालको नक्सा राखिएको बुटवलका पूर्व नगर प्रमुख शिवराज सुबेदी बताउँछन् । त्यसो त ४० को दशक सम्म नेपाली सञ्चारगृह र गीतसंगीतको क्षेत्रमा ‘पुर्वमा टिस्टा पुगेथ्यौं, पश्चिम किल्ला काँगडा…’ भन्ने गीत बज्ने गर्दथ्यो । तर पछिल्लो समय त्यस्ता इतिहास झल्कने गीत बज्न छाडेका छन् ।
भारतीय पछिल्लो कदमले नेपालीहरुमा पनि राष्ट्रियताको चेतना जागेको छ । २ वर्ष अघि नै बुटवलले थालेको ग्रेटर नेपालको प्रचारलाई भारतीय कदमले थप उर्जा थपिदिएको छ । संसदमा बोल्दै कांग्रेस महामन्त्री गगन थापाले पनि नेपालको संसदमा ग्रेटर नेपालको नस्सा राख्न माग गरेका छन् ।
प्रतिक्रिया