बंगलादेशी पर्यटकलाई निम्तो दिन होटल एसोसिएसनको टिम ढाका प्रस्थान

काठमाडौं। होटल एसोसिएसन अफ नेपाल (हान) को टोली बंगलादेशको राजधानी ढाका प्रस्थान गरेको छ । बंगलादेशका पर्यटकलाई नेपालमा निम्तो बाँड्नको लागि होटल एसोसिएसन अफ नेपालको टोली ढाका प्रस्थान गरेको हो ।

नेपालका पर्यटकीय स्थलहरूको जानकारी दिँदै घुम्न आउनका लागि त्यहाँका पर्यटनसँग सम्बन्धित संघसस्थाको समन्वयमा विभिन्न कार्यक्रम आयोजना हुनेछ ।

हानका अध्यक्ष विनायक शाह र महासचिव साजन शाक्यको नेतृत्वमा गएको टिमले ढाका र कंक्सबजारमा सेल्स मिसनका कार्यक्रम आयोजना गर्नेछ । सो अवसरमा नेपाल आउँदा लाग्ने होटल प्याकेजको बारेमासमेत जानकारी दिइने छ ।

पाँच दिनका लागि ढाका प्रस्थान गरेका हान टिमको निर्वाचनपछि पहिलो सेल्स मिसन हो । ढाका प्रस्थान गरेका टिमलाई बिदाई गर्न त्रिभुवन अन्तर्राष्ट्रिय विमानस्थलमा पुगेका कोषाध्यक्ष युवराज श्रेष्ठले पछिल्लो समय बंगाली पर्यटकको रोजाई नेपाल परिरहेको बेला हानको यो सेल्स मिसनले अझ प्रभावकारी भूमिका निर्वाह गर्न सक्ने विश्वास व्यक्त गरेका छन् ।