सुन तस्करी प्रकरण : गालेपछिको सुनको खुद तौल ६० किलो ७१६ ग्राम ठहर

काठमाडौं । त्रिभुवन अन्तर्राष्ट्रिय विमानस्थल भन्सार कार्यालय बाहिर बरामद सुनको खुद तौल ६० किलो ७१६ ग्राम ठहर भएको छ । नेपाल राष्ट्र बैंकको टक्सार महाशाखामा आज बरामदी सुन गालेर जोख्दा ६० किलो ७१६ ग्राम ठहरिएको हो ।

ब्रेक शुबाट छुट्टयाएको सुन गालेर जोख्दा ६० किलो ७१६ ग्राम भएको नेपाल राष्ट्र बैंकको टक्सार महाशाखाका प्रमुख थानेश्वर आचार्यले बताए । गाल्नुअघि यो सुन ६० किलो ७८९ ग्राम रहेकोमा गाल्दा खेरि सुन ७३ ग्राम घटेको बताइएको छ ।

राजस्व अनुसन्धान विभागले तीन साउनमा विमानस्थल भन्सार कार्यालय बाहिर सिनामंगलबाट सुन सहितको १५५ किलो ‘ब्रेक शु’ बरामद गरेको थियो । मोटरसाइकल र स्कुटरको ब्रेक शुभित्र लुकाएर सुन ल्याएको पाइएको थियो । त्यसबेला ब्रेक शु सहितको तौल १५५ केजी रहेको सार्वजनिक गरिएको थियो ।

हिजो ब्रेक शुबाट अलग गरिएको सुन आज सीआईबी, राजस्व, नेपाल राष्ट्र बैंक र टक्सार कार्यालयका प्रतिनिधिको रोहबरमा गालेर जोखिएको हो । सुन प्रकरणको अनुसन्धान १९ दिनसम्म गरेर राजस्व अनुसन्धान विभागले थप छानबिनको जिम्मा सीआईबीलाई लगाएको थियो ।

सीआईबीले संगठित अपराध र राजस्व छलीको कसुरमा यो प्रकरणको अनुसन्धान गरिरहेको छ ।