बुटवल । समाजवादी मोर्चा नेपालले आज बुटवलमा सन्देशसभा गर्दैछ । बुटवलस्थित अन्तर्राष्ट्रिय सम्मेलन केन्द्रमा आज दिउँसो १ बजेबाट सभा सुरू हुने सभामा समाजवादी मोर्चा नेपालमा आवद्ध रहेका शीर्ष नेताहरुले सम्बोधन गर्ने जनता समाजवादी पार्टीका केन्द्रीय कार्यकारिणी सदस्य राजकिशोर साहले जानकारी दिए ।
सभामा प्रधानमन्त्री तथा माओवादी केन्द्रका अध्यक्ष पुष्पकमल दाहाल ‘प्रचण्ड’, एकीकृत समाजवादीका अध्यक्ष तथा पूर्व प्रधानमन्त्री माधवकुमार नेपाल, नेपाल कम्युनिष्ट पार्टीका महासचिव विप्लव सी र जनता समाजवादीका केन्द्रीय परिषद् सदस्य तथा प्रदेश इन्चार्ज राजकिशोर साहले सम्बोधन गर्ने कार्यक्रम छ ।
जसपा अध्यक्ष उपेन्द्र यादव भारतमा रहेकाले राजकिशोरले सम्बोधन गर्न लागेका हुन् । आजको सभाको व्यवस्थापन नेत्रविक्रम चन्द विप्लव नेतृत्वको नेकपाले गर्ने साहले जानकारी दिए ।
सभालाई सम्बोधन गर्न प्रधानमन्त्री प्रचण्ड दिउँसो १ बजे बुटवल पुग्ने कार्यक्रम रहेको छ । अरू नेताहरू भने बिहान १० बजे पुग्ने साहले बताए ।
समाजवादी मोर्चाको यो दोस्रो सन्देशसभा हो । सबै प्रदेशमा सभा गर्ने निर्णय गरेको मोर्चाले ८ गते मधेस प्रदेशको वीरगन्जमा सभा गरिसकेको छ ।
१३ गते सुदूरपश्चिमको धनगढीमा, १४ गते कर्णालीको सुर्खेतमा, १५ गते गण्डकीको पोखरामा, २३ गते बागमतीको हेटौँडामा, २५ गते कोशीको विराटनगरमा सभाहरू गर्ने कार्यक्रम मोर्चाको बैठकबाट निर्णय भइसकेको छ ।
सरकारमा सहभागी तीन दल र संसदमै नभएको विप्लव नेतृत्वको पार्टीबीच समाजवादी मोर्चा बनेको हो ।
प्रतिक्रिया