सुन तस्करी प्रकरणमा राहुल महरा पक्राउ

काठमाडौं । विद्युतीय चुरोट (भेप) मा लुकाएर सुन तस्करी प्रकरणमा रोल्पाका राहुल महरा पक्राउ परेका छन् ।

नेपाल प्रहरीको केन्द्रीय अनुसन्धान ब्यूरोले महरालाई बुधबार दिउँसो पक्राउ गरेको हो । महरा माओवादी केन्द्रका उपाध्यक्ष कृष्णबहादुर महराका कान्छा छोरा हुन् ।

चिनियाँ व्यापाराीले ल्याएको सुनसहितको भेप त्रिभुवन अन्तराष्ट्रिय विमानस्थल भन्सार कार्यालयले नियन्त्रणमा लिएपछि महराले त्यसलाई छुटाउन भन्सार प्रमुखलाई फोन गरेका थिए । उनको दुई सय भन्दा बढी पटक सुन तस्करीमा संलग्न व्यापारीसँग फोन सम्पर्क भएको थियो ।

यसअघि महरालाई पक्राउ नगरेको भन्दै सरकार विरुद्ध आलोचना भैरहेको थियो ।

राहुल महराले भने आफु अनुसन्धानलाई सहयोग गर्न सीआईबीमा उपस्थित भएको दाबी गरेका छन् ।
‘हामीमाथि हिलो छ्याप्ने कोसिस भएकाले स्वयम सिआइबीमा उपस्थित भै अनुसन्धानमा सहजीकरण गर्दैछु। नबिराउनु, नडराउनु,’ महराले बुधबार अपरान्ह फेसबुकमा लेखेका छन्।