एमालेमा हैन माओवादीमा पहिरो जान जरुरी छ : शंकर पोखरेल

बुटवल । नेकपा एमालेका महासचिव शंकर पोखरेलले माओवादीमा पहिरो जान जरुरी रहेको बताएका छन् ।

एमाले लुम्बिनी प्रदेश अधिवेशनलाई शनिबार बुटवलमा सम्बोधन गर्दै महासचिव पोखरेलले माओवादीमा अझै पहिरो जानुपर्ने बताएका हुन् ।

केही दिनअघि प्रधानमन्त्री एवं माओवादी केन्द्रका अध्यक्ष प्रचण्डले एमालेमा पहिरो जान लागेको भन्दै गरेको टिप्पणीप्रति प्रतिटिप्पणी गर्दै पोखरेलले यस्तो भनेका हुन् । उनले भने, ‘पहिरो एमालेमा होईन पहिरो माओवादीमा जान जरूरी छ । देश निर्माणका लागि माओवादीमा अझै पहिरो जान जरूरी छ ।’

महासचिव पोखरेलले लुम्बिनी प्रदेशमा विवाद भन्ने प्रचार गराएर पार्टीलाई कमजोर बनाउन खोजिएको आरोप लगाए । उनले आफु र विष्णु पौडेलका बीचमा विभाजनको हल्लालाई अधिवेशनले मिथ्या सावित गराउन प्रतिनिधिहरुलाई आग्रह गरे । अध्यक्ष केपी ओलीको नेतृत्वमा एमाले एकतावद्ध रहेको उनले दाबी गरे ।
पोखरेलले कसैको सहारा बिना २०८४ मा एमालेको एकल सरकार बनाउने गरी लाग्न कार्यकर्ताहरुलाई आग्ह गरे ।