काठमाडौं । काठमाडौं महानगरपालिका वडा नं. १६ का वडाध्यक्ष एवम् नेपाली कांग्रेस काठमाडौं क्षेत्र नं. ७ का क्षेत्रीय सभापति मुकुन्द रिजालको पार्थिवलाई श्रद्धान्जलीका लागि राष्ट्रिय सभागृहमा राखिएको छ ।
स्वर्गीय रिजालको पार्थीव शरीरलाई अहिले ११ बजेदेखि १२ बजेसम्म श्रद्धान्जलीका लागि सभागृहमा राखिएको हो । त्यसपछि पशुपति आर्यघाटमा १२ ३० देखि १३० बजेसम्म अन्तिम श्रद्धान्जलीका लागि राखिने र २३० बजे दाहसंस्कार गरिने कार्यक्रम रहेको छ ।
निमोनियाबाट ग्रस्त भएका रिजालको आज बिहान ७ ३० बजे काठमाडौंको ग्राण्डी अस्पतालमा उपचारको क्रममा निधन भएको थियो ।
रिजालको निधनप्रति नेपाली कांग्रेसका सभापति शेरबहादुर देउवाले दुख व्यक्त गरेका छन् । देउवाले पार्टीको संगठन निर्माण र नेपालको लोकतान्त्रिक आन्दोलनहरुमा पुर्याएको सक्रिय योगदानको स्मरण गर्दै रिजालप्रति भावपूर्ण श्रद्धाञ्जली अर्पण गरेका छन् । उनले शोक सन्तप्त परिवारजनप्रति पार्टी र आफ्नो तर्फबाट समवेदना प्रकट गरेका छन् ।
रिजाल नेपाली कांग्रेसको काठमाडौं महानगरको संगठन निर्माणमा सक्रिय नेताको रुपमा चिनिन्थे । २०२७ सालमा जन्मिएका उनी २०४६ सालको जनआन्दोलनको क्रममा प्रहरी हिरासतमा परेका थिए ।
रिजाल कामपा वडा नं. १६ मा दुई पटक वडाध्यक्षको रुपमा निर्वाचित भएका थिए ।
प्रतिक्रिया