शम्शेरगन्ज बस दुर्घटना अपडेट : मृत्यु हुनेको संख्या ७ पुग्यो (मृतकको नामावलीसहित)

नेपालगन्ज । बाँकेको राप्तीसोनारी गाउँपालिका-९ शम्शरेगञ्जमा रोकेर राखिएको ट्रकमा यात्रुबाहक बस ठोक्कीएर भएको दुर्घटनामा मृत्यु हुनेको संख्या ६ पुगेको छ । दुर्घटनामा परि चालक, सहचालक सहित ७ जनाको मृत्यु भएको प्रहरीले जनाएको छ । दुर्घटनामा परि ३१ जना घाइते भएका छन् ।

बर्दिया ठाकुरबाबा नगरपालिका ९ बेतहनीको सामुदायिक वन समुहको टोली लिएर दाङ गएको बस फर्कने क्रममा ट्रकसँग ठोक्कीएको हो । दाङबाट बर्दिया जाँदै गरेको ना ७ ख २३२१ नम्बरको बस सडक किनारमा रोकेर राखिएको ना ८ ख ६४०५ नम्बरको ट्रकमा ठोकिँदा दुर्घटना भएको राजमार्ग सुरक्षा तथा ट्राफिक ब्यवस्थापन कार्यालय बुटवलले जानकारी दिएको छ ।

प्रहरीले सुरुमा चितवनबाट नेपालगन्ज आउँदै गरेको जानकारी दिएपनि घाइतेहरुको बयान पछि दुर्घटनाको थप विवरण जानकारी दिएको हो ।

दुर्घटनामा मृत्युहुनेमा कस्तुरी थापा, काँशीराम थारू, रूपा परियार, जयन्त थारू, चानुराम चौधरी, चालक गोविन्द ठकुरी (जुगबहादुर चन्द) र एक जनाको पहिचान नखुलेको प्रहरीले जनाएको छ।

प्रहरीका अनुसार घाइतेहरुको नेपालगन्ज मेडिकल कलेज कोहलपुरमा उपचार भईरहेको छ ।