काठमाडौं । काठमाडौंबाट विराटनगरतर्फ जाँदै गरेको यात्रुवाहक बस धनुषामा दुर्घटना हुँदा १७ जना घाइते भएका छन्।
आइतबार बिहान पूर्व–पश्चिम राजमार्गअन्तर्गत धनुषाको मिथिला नगरपालिका–९ स्थित फुटबल ग्राउन्ड नजिक बागमती प्रदेश ०१-००६ ख ५२३७ नम्बरको बस अनियन्त्रित भएर पल्टिएको हो।
जिल्ला प्रहरी कार्यालय, धनुषाका अनुसार अर्को बसलाई ओभरटेक गर्ने क्रममा बस अनियन्त्रित भई सडकमै पल्टिएको प्रारम्भिक अनुसन्धानबाट खुलेको छ।
दुर्घटनामा घाइते भएका १७ जनालाई उपचारका लागि लालगढस्थित मोइल अस्पतालमा भर्ना गरिएको प्रहरीले जनाएको छ।
बसमा चालकसहित ३३ जना यात्रु सवार रहेको र अन्य यात्रु सकुशल रहेको प्रहरीले जानकारी दिएको छ। दुर्घटनाबारे थप अनुसन्धान भइरहेको प्रहरीले जनाएको छ।
प्रतिक्रिया