काठमाडौं । चीन भ्रमणमा रहेका प्रधानमन्त्री पुष्पकमल दाहाल प्रचण्ड र चिनियाँ राष्ट्रपति सी चिनफिङको उपस्थितिमा नेपाल र चीनका प्रतिनिधिमण्डलबीच द्विपक्षीय वार्ता भएको छ ।
चीनको हाङ्जाओस्थित एक होटलमा वार्ता भएको हो । यसअघि राष्ट्रपति सीले आयोजना गरेको स्टेट ब्यान्क्वेटमा प्रधानमन्त्री प्रचण्डको संक्षिप्त भेट भएको थियो ।
द्विपक्षीय वार्तामा प्रधानमन्त्री प्रचण्ड, परराष्ट्रमन्त्री नारायणप्रकाश साउद लगायतका सहभागी छन् ।
प्रधानमन्त्री प्रचण्ड हाङ्जाओबाट भोलि राजधानी बेइजिङ जाने कार्यक्रम रहेको छ । बेइजिङमा सेप्टेम्बर २५ मा चिनियाँ समकक्षी लि छियाङसँग उनले द्विपक्षीय वार्ता गर्नेछन्। यसैगरी उनले चिनियाँ राष्ट्रिय जनकङ्ग्रेसका स्थायी समिति अध्यक्ष झाओ लेजीसँग पनि भेटवार्ता गर्ने कार्यक्रम रहेको छ ।
प्रधानमन्त्री प्रचण्डको सम्मानमा बेइजिङस्थित नेपाली राजदूतावासले रात्री भोजको आयोजना हुनेछ । बेइजिङमा आयोजना हुने चीन–नेपाल लगानी सम्मेलनलाई उनले सम्बोधन गर्ने कार्यक्रम छ।
बेइजिङबाट प्रधानमन्त्री प्रचण्ड २६ सेप्टेम्बरमा चीनको चोङछिङ पुग्नेछन् । उनले त्यहाँ कृषि र औद्योगिक क्षेत्रमा गरेको विकासको अवलोकन गर्नेछन् । त्यसपछि उनी तिब्बत स्वशासित क्षेत्रको ल्हासाको भ्रमण गर्नेछन् । प्रधानमन्त्री प्रचण्ड ल्हासाबाट सेप्टेम्बर ३० मा काठमाडौं फर्किनेछन् ।
प्रतिक्रिया