पर्वत । पर्वतको कुश्मा नगरपालिका–७ र ८ को सिमानामा रहेको तमादी खोलामा आएको बाढीले पोखरा–बागलुङ सडकमा गुडिरहेको जीप बगाउँदा तीन यात्रु बेपत्ता भएका छन् ।
बागलुङबाट पोखरातर्फ जाँदै गरेको ग१ज ६२१३ नम्बरको जीप साँझ ६ः३० बजेतिर बाढीले बगाउँदा तीन पुरुषसहित गाडीसमेत बेपत्ता भएको हो । चार जना सवार उक्त जीपमा ड्राइभर भने हामफालेर बाँच्न सफल भएका छन् । जिल्ला प्रहरी कार्यालय पर्वतका प्रहरी प्रमुख खुमलाल भुसालका अनुसार जीप र हराइरहेका यात्रुको खोजी कार्य भइरहेको छ ।
घटनास्थलमा बाढीले जीपलाई पुरेको र अहिले नेपाल प्रहरी, सशस्त्र प्रहरी र नेपाली सेनाको टोलीले खनेर गाडी निकाल्ने प्रयास भइरहेको डीएसपी भुसालले बताए । प्रहरीका अनुसार गाडीका केही पार्टपुर्जा र १ जनाको शव फेला परेको छ भने अन्यको खोजीकार्य सुरु गरिएको छ । शनिबार साँझ परेको भीषण वर्षाका कारण उक्त खोलामा बाढी आएको हो । सडकमा पुल नभई कजवे पार गर्ने क्रममा जीप बगाएको हो ।
गाडीमा पोखराको एक ब्यवसायिक प्रतिस्थानमा काम गर्ने कास्कीका एक जना, रुपन्देहीका एक जना र ठेगाना नखुलेको अर्का एकजना सवार रहेको प्रहरीले जनाएको छ ।
प्रतिक्रिया