नेपालगन्ज । नेपालगन्जमा सामाजिक सञ्जाल फेसबुक स्टाटसका कारण धार्मिक विवाद उत्पन्न भएर कर्फ्यु लगाउनुपर्ने अवस्था आएपछि नेपाल प्रहरीको साइबर ब्यूरोले सामाजिक सञ्जालबाट सामाजिक सदभाव खलबलिने स्टाटस पोष्ट नगर्न आग्रह गरेको छ ।
प्रहरीको साइबर ब्यूरोले आज एक विज्ञप्ति जारी गर्दै विभिन्न सामाजिक सञ्जाल तथा अनलाइन माध्यमको दुरुपयोग गरी जातीय, धार्मिक र साम्प्रदायिक सद्भावमा खलल पुन्याउने र राष्ट्रिय सुरक्षा, राष्ट्रिय एकतामा आँच पुग्ने तथ्यहिन विषय वस्तु एवं व्यक्तिको प्रतिष्ठा, आत्म सम्मानमा ठेस पुग्याउने र जातीय भेदभाव, छुवाछुत, श्रमप्रति अवहेलनाका साथै शान्ति सुरक्षा भंग हुने कार्यलाई बढवा दिने सामाग्री प्रकाशन तथा प्रदर्शन नगर्न नगराउन आग्रह गरेको हो ।
ब्यूरोले प्रचलित कानुनले रोक लगाएका सामाग्रीहरू प्रकाशन वा प्रदर्शन गरेको पाइएमा कानुन बमोजिम कारबाही हुने समेत विज्ञप्तिमा उल्लेख गरिएको छ ।
नेपालगन्जमा सामाजिक सञ्जाल फेसबुकमा पोष्ट गरिएको स्टाटसमा गरिएको कमेन्टको विषयलाई लिएर धार्मिक सदभावमा खलल पुगेको छ । धार्मिक विवादलाई मत्थर गराउन भन्दै स्थानीय प्रशासनले जारी गरेको कर्फ्यु आदेश अहिले पनि कायम रहेको छ । सामान्य स्टाटस कमेन्टको निहुमा ५ प्रहरी सहित २२ जना घाइते हुनुका साथै सार्वजनिक र निजी सम्पत्तिमाथि तोडफोड भएको प्रशासनले जनाएको छ ।
प्रतिक्रिया