नेपालगन्ज । नेपाल प्रहरीको साइबर ब्यूरोले सामाजिक सञ्जालमा सार्वजनिक नैतिकता तथा शिष्टाचार विरूद्धका सामाग्री प्रकाशन गरेको अभियोगमा पक्राउ परेको विज्ञप्तिमा भारतको रुपैडियालाई नेपालगन्जको रुपैडिया उल्लेख गरेपछि सामाजिक सञ्जालमा प्रहरीको आलोचना भएको छ । भारतको बहराईच जिल्ला अन्तर्गत जमुनाहा नाका पारीको भारतीय बजार रुपैडियालाई नेपालगन्जको रुपैडिया उल्लेख गरि प्रहरीले बिज्ञप्ति सार्वजनिक गरेपछि सामाजिक सञ्जालमा प्रहरीको आलोचना भएको हो ।
प्रहरीको साइबर ब्यूरोले प्रकाशित गरेको विज्ञप्तिमा युट्युब लगायतका डिजिटल प्लेटफर्महरूमा नियमित रूपमा व्यक्तिहरू तथा संस्थालाई लक्षित गरी तथ्यहीन र आधारहीन विषयमा सामाग्रीहरू प्रसारण गरी नकारात्मक धारणा फैलाएको तथा सार्वजनिक नैतिकता तथा शिष्टाचार विरूद्धका सामाग्री बारम्बार प्रकाशन समेत गर्ने गरेको घटनाको अनुसन्धानको क्रममा साइबर ब्यूरोबाट खटिएको प्रहरीले केन्द्रीय अनुसन्धान ब्यूरोको सहयोगमा उक्त कार्यमा संलग्न उनलाई नेपालगंज रूपैडियाबाट पक्राउ गरेको उल्लेख छ ।
सामाजिक सञ्जालमा सार्वजनिक नैतिकता तथा शिष्टाचार विरूद्धका सामाग्री प्रकाशन गरेको अभियोगमा बाग्लुङ निसिखोला गाउँपालिका(४ घर भएका ३६ वर्षीय ड्राइभर रेशम भन्ने रेशम राज पौडेललाई सोमबार प्रहरीले पक्राउ गरेको जनाएको छ ।
बाँके र नेपालगन्जको नेपाली भूमीमा रुपैडिया नामको कुनै स्थान नभएको जनाउँदै सामाजिक सञ्जाल प्रयोगकर्ताहरुले नेपालको भूगोलका बारेमा प्रहरीलाई ज्ञान नहुनु दुखद भएको जनाएका छन् ।
प्रतिक्रिया