काठमाडौं । भूकम्पबाट घर पूर्णरुपमा क्षति भएका बझाङका भूकम्प पीडितलाई सरकारले तत्काल राहतस्वरुप ५० हजार रुपैयाँ राहत दिने भएको छ ।
पीडितहरुको अवस्था अवलोकन निरक्षिण गर्न बझाङ पुगेका प्रधानमन्त्री पुष्पकमल दाहाल प्रचण्डले राहत, पुनर्स्थापना तथा पुनर्निर्माणका लागि पूर्णरुपमा घर क्षति भएका पीडितलाई प्रधानमन्त्री प्रचण्डले राहतको घोषणा गरेका हुन् ।
सरकारले भूकम्पबाट प्रभावित अन्य परिवारलाई राहतस्वरूप परिवार संख्याको आधारमा मापदण्ड बमोजिम १५ देखि २० हजार तत्काल राहत खर्च दिने भएको छ ।
राहत सामग्रीहरू जस्तै पाल, कम्बल, औषधि, खाद्यान्न, लत्ताकपडा, अपाङ्गता भएका व्यक्तिलाई आवश्यक पर्ने सामग्रीहरुको व्यवस्थापन गरिनेछ भने थप सामग्री आवश्यक परेमा तीनै तहका सरकारको समन्वयमा व्यवस्था गरिने बताइएको छ । सरकारले भूकम्पमा परी घाइतेहरूको निःशुल्क उपचारको घोषणा गरिसकेको छ ।
यस्तै सरकारले भूकम्पले निम्त्याएको पहिरोमा परी मृत्यु भएकाको परिवारलाई पनि तत्काल २ लाख सहयोग दिने भएको छ ।
भूकम्पले भत्किएका, चिरा परेका, आंशिक क्षति भएका घर तथा संरचनाहरुको दीर्घकालीन पुनर्निर्माण र पुनर्स्थापनाका लागि स्थानीय तह, जिल्ला प्रदेशबाट प्राप्त क्षति मूल्यांकनका आधारमा कार्यविधि बनाई यसअघि गोरखा, सिन्धुपाल्चोक लगायतका जिल्लामा गरिएको पुनर्निर्माण जस्तै स्थानीय सामग्रीहरूको प्रयोग गरी सुरक्षित पुनर्निर्माणको काम अगाडि बढाइने प्रधानमन्त्री प्रचण्डले प्रतिबद्धता जनाएका छन् ।
सरकारी कार्यालय, सामुदायिक भवन, स्कूल आदि क्षति पुगेका संरचनाहरूको यथाशीघ्र पुनः निर्माण गरिने समेत जनाइएको छ ।
प्रतिक्रिया