काठमाडौं । प्रधानमन्त्री पुष्पकमल दाहाल प्रचण्डको निमन्त्रणमा चार दिने औपचारिक भ्रमणका लागि नेपाल आएका संयुक्त राष्ट्रसंघका महासचिव एन्टोनियो गुटेरसले आज महत्वपूर्ण भेटघाट गर्ने
भएका छन् ।
गएराति १ बजे काठमाडौं आइपुगेका महासचिव गुटेरसले आज अपरान्ह राष्ट्रपति भवन शितल निवासमा राष्ट्रपति रामचन्द्र पौडेलसँग शिष्टाचार भेटघाट गर्ने कार्यक्रम रहेको छ ।
उनले त्यसअघि दिउँसो २ बजे प्रधानमन्त्री कार्यालय सिंहदरबारमा प्रधानमन्त्री प्रचण्डसँग भेटवार्ता गर्नेछन् । भेटपछि प्रधानमन्त्री र गुटेरसले संयुक्त पत्रकार सम्मेलन गर्ने कार्यक्रम रहेको परराष्ट्रमन्त्रालयले जनाएको छ ।
गुटेरसले त्यसअघि उपप्रधान तथा रक्षामन्त्री पूर्णबहादुर खड्का, उपप्रधान तथा गृहमन्त्री नारायणकाजी श्रेष्ठ र परराष्ट्रमन्त्री एनपी साउदसँग भेट्नेछन् ।
नेपाली कांग्रेसका सभापति शेरबहादुर देउवा र नेकपा एमालेका अध्यक्ष केपी शर्मा ओलीलाई भने उनले संसद भवन बानेश्वरमा भेट्नेछन् । भेटवार्तामा नेपाल र संयुक्त राष्ट्रसंघको सम्बन्ध, नेपालको शान्ति प्रक्रिया लगायतका विषयमा छलफल हुनेछ ।
गुटेरसको स्वागत तथा सम्मानमा प्रधानमन्त्री प्रचण्डले रात्रिभोजको आयोजना गर्नेछन् ।
प्रतिक्रिया