आज नेपाल र यमन बिच प्रतिस्पर्धा हुदैँ, साँझ ७ बजेबाट खेल सुरु हुने

काठमाडौं । फिफा विश्वकप-२०२६ छनोटको दोस्रो चरणमा आज (मंगलबार) यमनविरुद्ध प्रतिस्पर्धामा उत्रिँदा नेपाल पहिलो जितको खोजीमा हुनेछ ।

यसअघि छनोटको दोस्रो चरणको आफ्नो पहिलो खेलमा नेपालले युनाइटेड अरब इमिरेट्स (यूएई) विरुद्ध ४-० को हार बेहोरेको थियो । छनोटको आगामी चरणमा प्रवेश गर्ने सम्भावना कायम राख्न नेपाललाई आज जितको आवश्यकता छ ।

खेलको पूर्वसन्ध्यामा नेपाली टिमका मुख्य प्रशिक्षक भिन्चेन्सो अल्बर्टो एनेसले पनि यमनविरुद्ध जित्नका लागि खेल्ने बताएका थिए ।

“यमनसँग नेपालको यसअघिका खेलको नतिजा राम्रो छैन । सन् २०१७ मा गोलरहित बराबरी खेल्नुबाहेक नेपालले सबै खेलमा हार बेहोरेको छ । यसपटक हामी जित्न चाहन्छौँ । हामी उच्चस्तरको प्रदर्शन गर्न चाहन्छौँ । किनकि हामी निकै बलियो टिमसँग खेल्न जाँदैछौँ । जोसँग निकै अनुभवी प्रशिक्षकको साथ छ,” उनले भने ।

त्रिपुरेश्वरस्थित दशरथ रंगशालामा हुने यो खेल राति ७ बजेदेखि सुरु हुनेछ । खेल राति अबेरसम्म हुने भएपछि अखिल नेपाल फुटबल संघ (एन्फा)ले समर्थकलाई घर फर्किन विभिन्न रुटमा १५ वटा बसको व्यवस्था गरेको छ ।

छनोटको दोस्रो चरणमा नेपाल समूह ‘एच’ मा छ । यस समूहमा नेपालसँगै यमन, युनाइटेड अरब इमिरेट्स (यूएई) र बहराइन छन् । यसअघि पहिलो खेलमा नेपाल यूएईसँग उसैको मैदानमा ४-० ले पराजित भएको थियो ।

नेपालले यसअघि छनोटको पहिलो चरणमा लाओसविरुद्ध समग्रमा २-१ को जित निकालेको थियो ।