म्याग्दी । म्याग्दी सदरमुकाम बेनीमा आज सम्पन्न बेनी नगरपालिका स्तरीय चौथो राष्ट्रपति रनिङ शिल्ड खेलकुद प्रतियोगिताको उपाधि साविक विजेता प्रकाश माविले जितेको छ । प्रतियोगितामा २२ स्वर्ण र पाँच रजत पदक प्राप्त गर्दै प्रकाश माविले उपाधि चुमेको हो । उपाधि विजेता प्रकाश माविलाई रु ५१ हजार, रनिङ शिल्ड र प्रमाणपत्रद्वारा पुरस्कृत गरिएको छ ।
यस्तै प्रतियोगितामा पाँच स्वर्ण, १० रजत र दुई कास्य पदकसहित न्यू वेष्ट प्वाइन्ट आवासीय मावि दोस्रो तथा दुई स्वर्ण, एक रजत र दुई कास्य पदकका साथ माउण्ट एभरेष्ट आवासीय मावि तेस्रो भयो । दोस्रो र तेस्रो हुने विद्यालयले क्रमश रु ४० हजार र रु ३० हजार पुरस्कार प्राप्त गरे । प्रतियोगितामा २५ विद्यालय सहभागी थिए ।
बेनी नगरपालिकाका प्रमुख सुरत केसी, उपप्रमुख ज्योति लामिछाने, शिक्षा विकास तथा समन्वय इकाइका प्रमुख दलबहादुर थापा, प्रतियोगिताका संयोजक एवं सामाजिक विकास समितिका संयोजक चक्र केसी, जिल्ला खेलकुद विकास समितिका अध्यक्ष दिनेश केसीलगायतले पुरस्कार वितरण गरे । विद्यालय तहमा रहेका खेल प्रतिभाको पहिचान गर्न प्रतियोगिताबाट मद्दत पुगेको नगर प्रमुख केसीले बताए ।
तीन दिनसम्म सञ्चालन भएको सो प्रतियोगितामा भलिबल, एथलेटिक्स, कबड्डीलगायत खेलमा विद्यार्थीले प्रतिस्पर्धा गरेका थिए ।
प्रतिक्रिया