काठमाडौं । इंग्लिस प्रिमियर लिग अन्तर्गत लिभरपुल र आर्सनलबीचको खेल बराबरीमा सकिएको छ । गएराती सम्पन्न खेलमा लिभरपुल र आर्सनल १-१ गोलको बराबरीमा रोकिएका हुन् ।
लिभरपुलको घरेलु मैदान एनफिल्डमा सम्पन्न खेलमा खेलको चौथो मिनेटमा नै आर्सनलले गाब्रियल मागालहाएसको गोलमा अग्रता लिएको थियो । त्यसपछि खेलको २९ औं मिनेटमा मोहमद सलाहको गोलमा लिभरपुलले बराबरी गरेको थियो । खेलमा त्यसपछि कुनै गोल हुनसकेन र खेल १-१ को बराबरीमा सकियो ।
यो बराबरीपछि आर्सनल लिगको शिर्ष स्थानमा कायम रहेको छ । आर्सनलको १८ खेलमा ४० अंक रहेको छ । त्यसैगरी लिभरपुलको १८ खेलमा ३९ अंक छ र लिगको दोस्रो स्थानमा रहेको छ ।
त्यस्तै १८ खेलमा ३९ अंकनै रहेको एस्टन भिल्ला गोल अन्तरले पछि पर्दै तेस्रो स्थानमा रहेको छ ।
प्रतिक्रिया